म. टा. क्रीडा प्रतिनिधी, नागपूर
नितीन पटारियाची शतकी खेळी व पंकज पांडेच्या अर्धशतकी खेळीच्या जोरावर लोकमत व पुण्यनगरी संघाने प्रतिस्पर्धी संघांचा मोठ्या फरकाने पराभव करत स्पर्धेत आगेकूच केली. स्पोर्ट्स जर्नलिस्ट असोसिएशन ऑफ नागपूरच्या (एसजेएएन) वतीने व ओसीडब्लू आणि स्टेट बँक ऑफ इंडियाच्या सहकार्याने ही स्पर्धा सुरू आहे.
आंबेडकर मैदानावर झालेल्या पहिल्या लढतीत लोकमतने २० षटकांत ५ बाद २५४ धावा केल्या. यात सलामीवीर नितीन पटारियाने ४८ चेंडूत ११८ धावा केल्या. या खेळीत ११ चौकार व आठ षटकारांचा समावेश होता. त्याला कर्णधार अमित खोडकेने ३१ चेंडूत ५७ धावा करत उत्तम साथ दिली. प्रत्युत्तरात लोकसत्ताचा संघ १०० धावांवर गारद झाला. लोकसत्ताकडून चंद्रशेखर कुथेच्या नाबाद २२ धावा वगळता इतर सर्व फलंदाज अपयशी ठरले. लोकमतकडून रविराज अंबडवारने ४, तर प्रमोद इंगोलने दोन गडी बाद केले. वसंतनगर मैदानावर झालेल्या दुसऱ्या लढतीत पुण्यनगरी संघाने साखळी लढतीत दैनिक भास्कर विरुद्ध प्रथम फलंदाजी करत २० षटकात ६ बाद १८२ धावा केल्या. यात कर्णधार पंकज पांडेने सर्वाधिक ८९ धावा केल्या. त्याला श्रीकांत बोंदरेने ५४ धावा करत उत्तम साथ दिली. प्रत्युत्तरात दैनिक भास्करचा संघ ५३ धावांवर गारद झाला. पुण्यनगरी संघाकडून सुनील खोरगडेने सहा गडी बाद केले. शतकी खेळी करणारा नितीन पटारिया व अर्धशतकी खेळी करणारा पंकज पांडे यांना नागपूर जिल्हा व्हॉलीबॉल संघटनेचे सचिव सुनील हांडे यांच्या हस्ते सामनावीराचा पुरस्कार देण्यात आला.
संक्षिप्त धावफलक
डॉ. आंबेडकर कॉलेज मैदान
लोकमत- २० षटकांत ५ बाद २५४ (नितीन पटारिया ११८, अमित खोडके ५७) गोलंदाजी- अजिंक्य दलाल २/३७, लोकसत्ता २० षटकांत ८ बाद १०० (चंद्रशेखर कुथे नाबाद २२, रविराज अंबडवार ४/६, प्रमोद इंगोल २/२३)
लोकमत १५५ धावांनी विजयी
वसंतनगर मैदान
पुण्यनगरी २० षटकांत ६ बाद १८२ (पंकज पांडे ८९, श्रीकांत बोंदरे ५४) गोलंदाजी- भालेराव ३/५५, दैनिक भास्कर १३.५ षटकात सर्वाबद ५३ (श्रीकांत भालेराव २०) सुनील खोरगडे ६/१०
पुण्यनगरी १२९ धावांनी विजयी
आजचे सामने
तरुण भारत विरुद्ध सकाळ, वसंतनगर मैदान