सरावासाठी बॉक्सर करतायेत
घरातील साहित्याचा वापर
वृत्तसंस्था, कोलकाता
करोना विषाणूच्या वाढत्या प्रादुर्भावामुळे अनेक खेळाडूंचा सराव बंद झाला आहे. मात्र, अशा कठीण परिस्थितीतही काही बॉक्सरनी घरातील टायर, पाइप, रॉडसारख्या सामानाचा वापर करून तंदुरुस्त राहण्याचा आणि सरावाचा मार्ग शोधला आहे. अर्थात, इच्छा तेथे मार्ग, याचाच प्रत्यय या खेळाडूंमुळे येत आहे.
बॉक्सर सोनिया लाथर आणि कविंदर बिश्त हे ऑलिंपिकचे तिकीट मिळविण्यासाठी कोणतीही कसर बाकी सोडू इच्छित नाही. सरावात खंड पडू द्यायचा नाही आणि पूर्णपणे तंदुरुस्त राहायचे, यासाठी ते घरातील साहित्याचा वापर करत आहेत. जागतिक स्पर्धेत दोनदा उपांत्यपूर्व फेरीपर्यंत मजल मारणारा कविंदर म्हणाला, की मी दिवसातून दोनदा सराव करतो. बॉक्सिंग महासंघ आणि मुख्य प्रशिक्षक यांनी सरावाचा कार्यक्रम आखून दिला आहे. त्यानुसार मी सराव करतो. आमचे परिक्षणही केले जाते. आम्ही सराव करतो. मात्र, ज्या प्रमाणे आम्ही कॅम्पमध्ये करत होतो, तसा सराव नाही. वॉर्म-अपसाठी मी पायऱ्यांवर वरखाली करतो. आमच्याकडे जास्त जागा नाही. त्यामुळे मी टेरेसवरच सराव करतो. दोऱीच्या उड्या, शॅडो बॉक्सिंग आणि व्यायाम करतो. वेट ट्रेनिंगसाठी मी रॉडचा वापर करत आहे. याशिवाय घरात अनेक जड वस्तू आहेत, त्याचाही उपयोग होतो.
आतापर्यंत मेरी कोमसह, अमितन पंघल, विकास कृष्णन, मनीष कौशिक आणि लव्हलिना बोर्गोहेन यांच्यासह नऊ भारतीय बॉक्सरनी टोकियो ऑलिंपिकमधील प्रवेश निश्चित केला आहे. करोनामुळे आता टोकियो ऑलिंपिक स्पर्धा एक वर्षाने पुढे ढकलण्यात आली आहे. एशियन स्पर्धेतील रौप्यविजेता कविंदर (५७ किलो) आणि जागतिक स्पर्धेतील रौप्य विजेती सोनिया (५७ किलो) यांनी मात्र अजून ऑलिंपिकमधील प्रवेश निश्चित केलेला नाही. पुरुषांच्या ५७, ८१, ९१ किलो आणि महिलांच्या ५७ किलो गटासाठी २६ आणि २७ मार्चला चाचणी होणार होती. मात्र, करोनामुळे ही चाचणी झाली नाही. २५ वर्षीय कविंदर म्हणाला, की विनाजोडीदार एकट्याने सराव करणे अवघड आहे. मात्र, माझी प्रेरणा कायम आहे.
ऑलिंपिकमध्ये ५७ किलो गट असल्याने, कविंदर ५६ हून ५७ किलो गटात आला आहे. हिसारला राहणाऱ्या सोनियानेही सरावासाठी घरातील सामानाचा वापर करत असल्याचे सांगितले. ती जड बांबू आणि विटांचा वापर करत आहे. जणू तिने छोटी जीमच तयार केली आहे. सोनिया म्हणाली, की वेट ट्रेनिंगसाठी मी घरातील सामानाचा वापर करत आहे. वेट ट्रेनिंगसाठी जड बांबूंचा वापर करत आहे. तसेच, छोट्या लोखंडी पाइपचाही वापर करत आहे.
... ही तर संधी
ऑलिंपिक पुढे ढकलल्याने अधिक चांगली तयारी आणि चुका सुधारण्यासाठी अधिक संधी मिळाल्याचे २८ वर्षीय सोनिया सांगते. ती म्हणाली, की मी उत्साहीत आहे. अशा वेळी तुम्ही नकारात्मक होऊन चालत नाही. मी जेवढी शक्य आहे, तेवढी कठोर मेहनत घेत आहे. मला आशा आहे, की लवकर परिस्थिती सुधारेल आणि मी चाचणीसाठी सज्ज असेल. शिमल्यात राहणारा उदयोन्मुख बॉक्सर गौरव चौहान (९१ किलो) हा सरावासाठी घरी टायर आणि बॉक्सिंग पिलोचा वापर करत आहे. गौरव म्हणाला, की मी पाइपस बॉक्स, रॉडचा सरावासाठी वापर करत आहे. माझ्याकडे टायर होते, त्याचा उपयोग आता सरावासाठी होत आहे. नव्या गोष्टी करून स्वतःला ध्येयासाठी प्रेरित करण्याची ही वेळ आहे.