म. टा. प्रतिनिधी, औरंगाबाद
महापालिकेत शिवछत्रपती पुरस्कार प्राप्त खेळाडूंना थेट नोकरीत सामावून घ्या अन्यता शिवजयंतीदिनी शिवछत्रपती क्रीडा पुरस्कार परत करण्याचा इशारा राज्यातील काही शिवछत्रपती क्रीडा पुरस्कार प्राप्त खेळाडूंनी दिला होता. उपमुख्यमंत्री अजित पवार यांची भेट घेऊन त्यांनाही औरंगाबादेत निवेदन देण्यात आले. त्यावेळी पवार यांनी खेळाडूंना थोडं थांबा, गुणवत्तेनूसार नोकरीत सामावून घेतले जाईल, असा सबुरीचा सल्ला दिला.
औरंगाबादेत एका बैठकीच्यानिमित्ताने उपमुख्यमंत्री अजित पवार हे आले होते. त्यावेळी शिवछत्रपती पुरस्कार प्राप्त सागर मगरे व स्नेहा ढेपे यांनी त्यांची भेट घेऊन नोकरीत सामावून घेण्याबाबतचे निवेदन दिले. 'शिवछत्रपती प्राप्त खेळाडूंना शैक्षणिक पात्रतेनूसार नोकरीत सामावून घेतल जाईल. त्यासाठी खेळाडूंनी सरकारला थोडा वेळ द्यावा तसेच शिवछत्रपती पुरस्कार परत करण्याची भूमिका मागे घ्यावी, असा सबुरीचा सल्ला अजित पवार यांनी यावेळी दिला.
सांगली महापालिकेने शिवछत्रपती क्रीडा पुरस्कार प्राप्त खेळाडूंना थेट नोकरीत सामावून घेतले आहे. महाराष्ट्र केसरी विजेत्यांनाही थेट नोकरी मिळते. मध्य प्रदेश राज्यात विक्रम पुरस्काराबरोबरच नोकरीही दिली जाते. औरंगाबाद महापालिकेने सांगली महापालिकेच्या धर्तीवर शिवछत्रपती क्रीडा पुरस्कार प्राप्त खेळाडूंना नोकरीत स्थान देण्याचा निर्णयघेतला आहे. परंतु, या निर्णयाची अद्यापही अंमलबजावणी झाली नाही. त्यामुळे सागर मगरे व स्नेहा ढेपे या शिवछत्रपती पुरस्कार प्राप्त खेळाडूंनी पुरस्कार सरकारला परत करण्याचा इशारा महापौर नंदकुमार घोडेले यांना निवेदन देऊन दिला होता. या प्रसंगी आमदार सतीश चव्हाण यांची उपस्थिती होती.
या संदर्भात सागर मगरे म्हणाला, 'उपमुख्यमंत्री अजित पवार यांना निवेदन दिल्यानंतर त्यांनी आमच्या निवेदनावर सकारात्मक चर्चा केली. नोकरीत सामावून घेण्याबाबतही गुणवत्तेवर आधारित निर्णय घेऊ, आम्हाला थोडा वेळ द्या असे त्यांनी सांगितले. आगामी कालावधीत मुख्यमंत्री व उपमुख्यमंत्री यांना राज्यातील शिवछत्रपती पुरस्कार प्राप्त खेळाडू भेट घेतील आणि त्यानंतरच योग्य निर्णय होईल.'