बीजिंग : कामगिरी उंचावण्यासाठी खेळाडूंनी जर उत्तेजकांचा वापर केला तर यापुढे त्यांच्यावर गुन्हेगारी स्वरूपाचे खटले दाखल करून त्यांना तुरुंगवासाची शिक्षा केली जाईल, असा निर्णय चीनमध्ये घेण्यात आला आहे. २०२२मध्ये बीजिंगमध्ये हिवाळी ऑलिम्पिकचे आयोजन करण्यात आले आहे. त्या अनुषंगाने चीनमध्ये हे कठोर पाऊल उचलण्यात आले आहे.
चीनचे क्रीडा प्रशासन आणि विधी विभागाने यासंदर्भात नियम तयार करण्यास सुरुवात केली असून २०१९च्या प्रारंभी हे नियम अमलात येतील. आम्ही उत्तेजकविरोधी मोहीम गांभीर्याने घेत आहोत, असा संदेश यातून देऊ इच्छितो, असे चीनच्या क्रीडा प्रशासनाचे प्रमुख गौ झोंगवेन यांनी म्हटले आहे.