पटना-जयपूरमध्ये 'फायनल पंगा'

मटा ऑनलाइन वृत्त । मुंबई

प्रो-कबड्डीच्या चौथ्या पर्वात पटना पायरेट्स आणि जयपूर पिंक पँथर्स या दोन दिग्गज संघांत 'फायनल पंगा' होणार आहे. पहिल्या उपांत्य फेरीच्या सामन्यात पटना पायरेट्सनं सुरेख खेळ केला आणि पुणेरी पलटनवर मात करून अंतिम फेरी गाठली. तर दुसऱ्या उपांत्य फेरीत तेलगू टायटन्सचा पराभव करून जयपूर पिंक पँथर्सनं अंतिम फेरीत प्रवेश केला. रविवारी, ३१ जुलैला हैदराबाद येथे अंतिम सामना रंगणार आहे.

हैदराबादमध्ये झालेल्या पहिल्या उपांत्य फेरीत पटनानं जबरदस्त खेळ केला. चुरशीच्या लढतीत पुणेरी पलटनला ३७-३३ नं हरवलं. फजल अत्राचलीनं महत्त्वाच्या क्षणी तीन पकडी केल्या. फजलला कुलदीपनं चांगली साथ दिली. त्यानं जबरदस्त पकडी करून ५ गुण मिळवून दिले. पुणेरी पलटननंही चांगली टक्कर दिली. मनजीत चिल्लर आणि दीपक हुडाची उत्कृष्ट खेळी संघाला विजय मिळवून देऊ शकली नाही.

दुसऱ्या उपांत्य फेरीत जयपूरनं तेलगू टायटन्सला ३४-२४ अशा गुणफरकानं पराभूत केलं. जयपूर संघ पहिल्या पर्वाचा विजेता ठरला होता. पण त्यानंतरच्या दोन स्पर्धांमध्ये त्यांना उपांत्य फेरीही गाठता आली नव्हती. यावेळी त्यांनी दोन पर्वांतील अपयश धुवून काढत अंतिम फेरी गाठली आहे. आता पटना आणि जयपूर या दोन बलाढ्य संघांत रविवारी अंतिम लढत रंगणार आहे. यावेळचे विजेतेपद कोण पटकावणार, याची उत्सुकता सर्वांना लागली आहे.