पटनाचा बेंगळुरूवर विजय

वृत्तसंस्था, पटना

प्रदीप नरवाल व राजेश मोंडल यांच्या चढाया पटना पायरेट्सच्या विजयात महत्त्वाची भूमिका बजावतात हे गुरुवारी पुन्हा एकदा बघायला मिळाले. घरच्या मैदानावरील प्रो कबड्डी लीग झुंजीत पटना पायरेट्सने बेंगळुरू बुल्सवर ३१-२५ असा विजय मिळवला. पटनातील पाटलीपुत्र क्रीडा संकुलात पार पडलेल्या या झुंजीत बेंगळुरूच्या ‘बुल्सनी’ स्वतःलाच लगाम घातला असे म्हणावे लागेल; कारण अखेरच्या आठ मिनिटांत त्यांच्या चढाईपटूंनी केलेल्या ९ चढायांपैकी बेंगळुरूला एकाही चढाईत गुण मिळवता आला नाही. यातूनच बेंगळुरूच्या बचाव फळीचे अपयश दिसून येते.

सुरिंदर नाडा व चढाई तज्ज्ञ रोहितकुमार यांनी सुपर पकडी केल्या; पण त्यात सातत्य नव्हते. बाकी रोहितकुमारला चढायांमध्ये नेहमीप्रमाणे छाप पाडता आली नाही. त्याच्या १९ पैकी फक्त चारच चढाया यशस्वी झाल्या. पटनाचा भक्कम बचाव व जोश यापुढे रोहितच्या तब्बल १२ चढाया निष्फळ ठरल्या. मोहित चिल्लरनेही बिरुदाला साजेशी कामगिरी केली नाही.

गुरुवारी पटनाच्या लढयांमध्ये पुन्हा भाव खाऊन गेले ते प्रदीव नरवाल (८ गुण) व राजेश मोंडल (६ गुण). मुंबईकर बाजीराव होडगेच्या भक्कम पकडींमुळे पटनाचा बचाव सक्षम होतो आहे. गुरुवारी बाजीरावसह कुलदीपसिंगने सुपर पकडीसह सहा गुण वसूल केले. बदली खेळाडू अबोलफझलने झकास चढाई करत बोनससह तीन गुणांची कमाई केली.