मुंबई : विझी ट्रॉफी क्रिकेट स्पर्धेत मुंबई संघाला उपांत्य फेरीत पुद्दुचेरी संघाकडून ७ विकेटसनी धक्कादायक मात सहन करावी लागली. मुंबईकरांचाच सहभाग असलेल्या पुद्दुचेरीने या अनुभवाचा विजयासाठी छान उपयोग करून घेतला. मुंबईचा गोलंदाज आविष्कार साळवी या संघाचा प्रशिक्षक असून शशांक सिंग व अभिषेक नायर हे या संघात आहेत. साळवीला ओंकार खानविलकर या मुंबईकर खेळाडूचेच सहकार्य सहाय्यक म्हणून लाभले आहे. पुद्दुचेरी क्रिकेटचे सचिव दामोदरन यांनी साळवीची प्रशिक्षक म्हणून नियुक्ती केल्यावर म्हटले होते की, मुंबई क्रिकेटची संस्कृती पुद्दुचेरीत आणण्याचा आम्ही प्रयत्न करणार आहोत. या विजयामुळे त्यावर एकप्रकारे शिक्कामोर्तब झाले.
गेल्या काही वर्षात मुंबई क्रिकेटच्या कामगिरीवर आणि वाटचालीवर टीका होत असताना त्यात या पराभवाची भर पडली आहे. मुंबईने या स्पर्धेतील चार सामने जिंकले. या स्पर्धेत मुंबईने रेल्वे, इंडियन ऑइलसारख्या संघांना नमविले होते. पण महत्त्वाच्या उपांत्य सामन्यात मुंबईला ही हार सहन करावी लागली. मुंबईने प्रथम फलंदाजी करताना ५० षटकांत २२४ धावा केल्या होत्या पण पुद्दुचेरीने ३ विकेटस गमावून ही धावसंख्या सहज पार केली.
पुद्दुचेरी हा संघ प्रथमच या हंगामात रणजीत खेळणार आहे. ईशान्येकडील संघांसह काही संघांना सर्वोच्च न्यायालयाने स्थानिक क्रिकेटमध्ये खेळण्याची मुभा दिली असून त्यात पुद्दुचेरीचा समावेश होतो.
ऑस्ट्रेलिया 'अ'
६ बाद २९०
बेंगळुरू : ऑस्ट्रेलिया 'अ' संघाने शनिवारी भारत 'अ' संघाविरुद्धच्या मालिकेतील दुसऱ्या अनौपचारिक कसोटी क्रिकेट सामन्यात पहिल्या डावामध्ये ६ बाद २९० धावा केल्या. ऑस्ट्रेलियाचा कर्णधार मिचेल मार्श ८६ धावांवर खेळत आहे. संक्षिप्त धावफलक : ऑस्ट्रेलिया 'अ' : पहिला डाव - ९० षटकांत ६ बाद २९० (मिचेल मार्श खेळत आहे ८६, ट्रेव्हिस हेड ६८, मायकेल नेसर खेळत आहे ४४, कुलदीप यादव २१-३-६८-२, शाहबाझ नदीम २३-६-६४-२) वि. भारत 'अ'.
....
मुरली विजय एसेक्सकडे
नवी दिल्ली : भारताचा सलामीवीर मुरली विजय या मोसमात इंग्लंडच्या देशांतर्गत कौंटी क्रिकेट स्पर्धेमध्ये एसेक्स संघाकडून खेळणार आहे. ३४ वर्षीय विजयला सध्या सुरू असलेल्या भारत-इंग्लंड मालिकेतील पहिल्या दोन कसोटींनंतर खराब कामगिरीमुळे भारतीय संघातून डच्चू मिळाला होता. तथापि, एसेक्सविरुद्धच्या सराव सामन्यात विजयने अर्धशतक झळकावल्यामुळे त्याची कौंटी मोसमासाठी निवड करण्यात आली.
....
भारत-मालदीव लढत
ढाका : सॅफ कप फुटबॉल स्पर्धेमध्ये भारतीय संघाचा सामना रविवारी मालदीव संघाशी होणार आहे. या स्पर्धेतील सलामीच्या लढतीत भारताने श्रीलंकेवर २-० अशा गोलफरकाने विजय मिळवला होता. त्यामुळे भारतीय संघाचा आत्मविश्वास उंचावला असला, तरी मालदीव संघाला कमी लेखणार नसल्याचे भारताचे प्रशिक्षक स्टिफन काँन्स्टंटाइन यांनी सांगितले. भारताने आतापर्यंत मालदीवविरुद्ध १८ पैकी १३ सामन्यांत विजय मिळवले आहेत.
.....
भारताचे सर्बियाशी सामने
नवी दिल्ली : भारताचा एकोणीस वर्षांखालील फुटबॉल संघ सर्बियाचा दौरा करणार असून, या दौऱ्यात भारत व सर्बियाच्या १९ वर्षांखालील संघांमध्ये दोन आंतरराष्ट्रीय मैत्रीपूर्ण सामने खेळवण्यात येतील. १३ आणि १७ सप्टेंबर रोजी हे सामने रंगतील. सर्बियाचा संघ हा जागतिक क्रमवारीत पहिल्या ५० संघांमध्ये असल्याने त्यांच्याविरुद्ध खेळल्याचा भारतीय युवा फुटबॉलपटूंना खूप फायदा होईल, असे मत राष्ट्रीय संघाचे संचालक अभिषेक यादव यांनी सांगितले.
....
नीरज गोयतचा विजय
नवी दिल्ली : भारताचा व्यावसायिक बॉक्सर नीरज गोयतने शनिवारी एर्नेस्टो कार्डोना सांचेझविरुद्धची लढत जिंकली. नीरजला कॅनडास्थित ली बॅक्सटर प्रमोशन या कंपनीने १.५ कोटी रुपयांना करारबद्ध केल्यानंतरचा त्याचा हा पहिलाच विजय आहे. गोयतने आतापर्यंत व्यावसायिक बॉक्सिंगमध्ये १४ लढती खेळल्या असून त्यापैकी ९ लढती जिंकल्या आहेत.
....