पुण्याकडून यजमान पराभूत

वृत्तसंस्था, हरयाणा (सोनीपत)

दीपक निवास हुडा फॉर्मात आला की प्रतिस्पर्ध्यांची फक्त पळापळा होते, मग तो यजमान संघ का असेनात... याचाच प्रत्यय बुधवारी प्रो कबड्डी लीगच्या झुंजीत पुन्हा एकदा आला. मोतीलाल नेहरू स्कूल ऑफ स्पोर्टसच्या संकुलात पार पडलेल्या झुंजीत पुणेरी पलटणने यजमान हरयाणा स्टीलर्सवर ३८-२२ असा सहज विजय मिळवला.

हरयाणाचा बचाव हा यंदाच्या प्रो कबड्डी लीगमधील चर्चेचा विषय आहे. सुरिंदर नाडा व मोहित चिल्लर असे स्टार बचावपटू त्यांच्या गोटात आहेत; पण दीपक हुडा आणि संदीप नरवाल (अष्टपैलू खेळ) या मोहऱ्यांनी हरयाणाला दादच दिली नाही. पुणेरी पलटण सध्या ‘ए’ झोनमध्ये दहा सामन्यांत ३७ गुणांसह तिसऱ्या क्रमांकावर आहेत. हरयाणा स्टीलर्स १४ सामन्यांतील ४६ गुणांसह दुसऱ्या क्रमांकावर आहेत. सामन्याच्या सुरुवातीला उभय संघ काहीसे संथ खेळत होते. त्यामुळेच पूर्वार्धातील पाच मिनिटे सामन्याचा धावफलक पुण्याच्या बाजून ४-१ अशी स्थिती होती. त्यात हरयाणाचे चढाईपटू चुका करत होते, ज्याचा फायदा घेत पुणेरी पलटणने दहा मिनिटांत ९-१ अशी आघाडी घेतली. पुढच्याच मिनिटाला पुण्याने हरयाणावर लोण चढवत आघाडी ११-१ अशी केली.

हरयाणाला सामन्यातील दुसरा गुण मिळवण्यासाठी १३व्या मिनिटापर्यंत वाट बघावी लागली. पुण्याचा झंझावात मात्र दुसऱ्या बाजूला सुरूच होता. दीपक हुडाने सामन्याच्या अखेरच्या मिनिटालाही हरयाणावर दयामाया दाखवली नाही. त्याने सुपर रेड केली. ज्यामुळे पुण्याने सामना ३८-२२ असा आरामात जिंकला.

हरयाणा स्टीलर्स

दीपक दाहिया ११

वझीरसिंग ३

पुणेरी पलटण

दीपक हुडा १३

संदीप नरवाल ८