WSSF: स्वप्न भंगले; सिंधूचा यामागुचीकडून पराभव

दुबई: भारताची आघाडीची महिला बॅडमिंटनपटू पी. व्ही. सिंधूचे दुबई सुपर सीरिजचे जेतेपद पटकावण्याचे स्वप्न भंगले. अत्यंत चुरशीच्या झालेल्या सामन्यात जपानच्या अकाने यामागुचीने सिंधूचा १५-२१, २१-१२, १९-२१ असा पराभव करत दुबई सुपर सीरीजच्या जेतेपदावर आपले नाव कोरले. अंतिम सामन्यात निकराची झुंज देणाऱ्या सिंधूला सीरिजच्या उपविजेतेपदावर समाधान मानावे लागले.

पहिल्या गेममध्ये सिंधूने सुरुवातीला २-१ अशी आघाडी घेतली. मात्र लवकरच यामागुचीने ५-३ अशी आघाडी घेत आपली स्थिती भक्कम बनवली. यानंतर यामागुचीने ८-५ अशी आघाडी मिळवली. पुढे सिंधूने जोरदार मुसंडी मारण्याचा प्रयत्न करत ७ अंकांची कमाई केली आणि १२-८ अशी आघाडी घेतली. सिंधू १४-१०ने पुढे असताना यामागुचीने तीन अंक मिळवत आपली आघाडी १३-१४वर नेली. जागतिक क्रमवारीत क्रमांक तीनवर असलेल्या सिंधूने आपल्यापेक्षा एका अंकाने वर असलेल्या यामागुचीला नंतर कोणतीही संधी न देता पहिला गेम २३ मिनिटांमध्ये २१-१५ असा आपल्या नावे केला.

दुसऱ्या गेममध्ये सिंधूने ५ अंक मिळवत दमदार सुरुवात केली. यानंतर यामागुचीने काही शानदार फटके लगावले आणि पुनरागमन करत वाढत जाणारे अंतर ५-७ असे केले. दुसऱ्या गेममध्ये ती पूर्वीपेक्षा अधिक संयमीत झाली. सावधगिरीने पावले टाकत यामागुचीने सिंधूविरुद्ध १०-८ अशी आघाडी घेतली. ब्रेक टाइमपर्यंत ती सिंधूविरुद्ध दुसऱ्या गेममध्ये ११-९ ने पुढेच होती.

यानंतर देखील यामागुचीने आपली आघाडी कायम ठेवली. दरम्यानच्या काळात सिंधूनेही काही चुका केल्या. या चुकांची किंमत सिंधूला पुढे मोजावी लागली. शेवटी यामागुचीने दुसरा गेम २१-१२ असा जिंकला.

तिसऱ्या गेममध्येही सिंधूने चांगली सुरुवात केली आणि लागलीच ४ अंकांची कमाई केली. ब्रेक टाइमपर्यंत सिंधू ११-८ ने पुढे होती. परंतु, यामागुचीने हार मानली नाही. ती सतत हल्ले करतच राहिली. शेवटी सामना जेव्हा १९-१९ असा बरोबरीत आला तेव्हा सिंधूने आपले अंक गमावत यामागुचीला आघाडी दिली. यामागुचीच्या एका फटक्यावर सिंधूचा रिटर्न नेटमध्ये गेला आणि सिंधूने हा किताब गमावला.