नदाल अजिंक्य; तिसऱ्यांदा जिंकली US ओपन

मटा ऑनलाइन वृत्त । न्यूयॉर्क

टेनिस कोर्टवर वादळासारख्या घोंघावणाऱ्या अव्वल मानांकित रफाएल नदालनं अपेक्षेप्रमाणे अमेरिकन ओपनच्या जेतेपदावर नाव कोरलं आहे. दक्षिण आफ्रिकेच्या केविन अँडरसनचा सरळ सेटमध्ये पराभव करून त्यानं यूएस ओपनची तिसरी आणि कारकीर्दीतील १६वी ग्रँडस्लॅम ट्रॉफी उंचावली.

दुखापतींचं दुष्टचक्र आणि 'बॅड पॅच' जिद्दीनं परतावून लावत राफानं यावर्षी कोर्टवर दमदार पुनरागमन केलं होतं. ऑस्ट्रेलियन ओपन स्पर्धेत तो उपविजेता ठरला होता, तर फ्रेंचच्या लाल मातीत प्रतिस्पर्ध्यांना धोबीपछाड देत त्यानं बाजी मारली होती. त्यानंतर, अमेरिकेत त्यानं वर्षातील दुसरं ग्रँडस्लॅम जेतेपद पटकावलं आहे.

कारकीर्दीत पहिल्यांदाच ग्रँडस्लॅम स्पर्धेची अंतिम फेरी गाठणाऱ्या ३२व्या मानांकित केविन अँडरसपुढे नदालचं पारडं खूपच जड होतं. स्वाभाविकच, तोच विजयाचा प्रबळ दावेदार होता. त्या थाटातच त्यानं सामन्यावर वर्चस्व गाजवलं. अँडरसनला एकही संधी न देता नदालनं अडीच तासांत ६-३, ६-३, ६-४ असा त्याचा फडशा पाडला आणि वर्षातील शेवटची ग्रँडस्लॅम स्पर्धा जिंकून शेवट गोड केला.

नोवाक जोकोविच, अँडी मरे आणि स्टॅनिसलास वॉवरिंका या टॉप फाइव्हमधील तिघांनी दुखापतीमुळे यूएस ओपनमधून माघार घेतली होती. त्यामुळे या स्पर्धेत म्हणावी तशी चुरस पाहायला मिळाली नाही.