म. टा. प्रतिनिधी, औरंगाबाद
गंगापूर तालुक्यातील अंबेलोहळ येथील जिल्हा परिषद शाळेचे क्रीडा शिक्षक राजेश भोसले पाटील हे पर्यावरण संरक्षण आणि संवर्धन जनजागृती करण्यासाठी सहा एप्रिल रोजी सलग १३ तास जलतरण करण्याचा विक्रम नोंदवणार आहेत.
महापालिकेच्या सिद्धार्थ जलतरण तलावावर गुढीपाडव्याच्या दिवशी सहा एप्रिल रोजी सलग १३ तास पोहणार आहेत. ग्रामीण तसेच शहरातील विविध भागांत वृक्ष लागवडीसाठी राजेश पाटील हे नेहमीच सक्रिय असतात. बोधीवृक्ष लागवडीसाठीही ते अनेक वर्षांपासून मेहनत घेत आहेत.
या नव्या उपक्रमाविषयी 'मटा'शी संवाद साधताना राजेश भोसले पाटील म्हणाले, 'पर्यावरण संरक्षण व संवर्धन ही आता काळाजी गरज आहे. युवा वर्ग तसेच निसर्गप्रेमींमध्ये याची आवड अधिक निर्माण व्हावी या हेतूने सलग १३ तास पोहण्याचा विक्रम प्रस्थापित करण्याचा प्रयत्न करणार आहे.'
औरंगाबाद जिल्हा जलतरण संघटनेने या उपक्रमास मान्यता दिली आहे. यासाठी विविध समित्यांचीही स्थापना करण्यात आली आहे. यात इ. एम. मगर, मुकेश बाशा, अश्विनी मार्कंडे, सागर बडवे, डॉ. सुनील देशमुख, डॉ. प्रफुल्ल जटाळे, डॉ. प्रफुल्ल संकलेचा, डॉ. एस. एस. सरोशिया, डॉ. चांदेकर, रवींद्र राठी, गोपाल पवार, रमेश मोरे, ज्ञानेश्वर वाघराज, डॉ. संदीप जगताप, अशोक काळे, संदीप चव्हाण, विष्णू लोखंडे, निकेत दलाल, धनंजय जगताप, राजेंद्र काळे, रवींद्र पवार, श्रीनिवास मोतीयेळे, आर. के. तुपे, अंकुशसिंग पाल, नागार्जुन, मुनीर, देविदास झिटे, योगेश पालकर यांचा समावेश आहे. सहा एप्रिल रोजी पहाटे चार वाजता राजेश पाटील हे जलतरणास प्रारंभ करणार आहेत. सायंकाळी सहा वाजता जलतरण संघटनेतर्फे राजेश पाटील यांना स्मृतिचिन्ह, सन्मानपत्र व रोख रक्कम देऊन सत्कार करण्यात येणार आहे.