मुंबई : रत्नकुमार क्रीडा मंडळाने चढाईपटू प्रीतम संकुळकर व बचावपटू गणेश जाधव यांच्या दमदार खेळामुळे बलाढ्य अमरप्रेम क्रीडा मंडळावर ११ गुणांनी विजय मिळविला आणि महापुरुष माघी गणेश जयंती उत्सव समिती व वरळी तालुका राष्ट्रवादी कॉंग्रेस पार्टी आयोजित राष्ट्रवादी चषक द्वितीय श्रेणी स्थानिक पुरुष ब गट कबड्डी स्पर्धेच्या उपांत्यपूर्व फेरीत प्रवेश केला. लोअर परेल येथील म्युनिसिपल शाळेच्या पटांगणामधील अन्य सामन्यात एकता संघ, यंग भारत सेवा मंडळ, पंचगंगा सेवा संघ यांनीसुध्दा उपांत्यपूर्व फेरी गाठली.
दादर युनियन जेते
मुंबई : प्रबोधन मुंबई टी-२० स्पर्धेत प्रथमच सहभागी होणाऱ्या दादर युनियन संघाने बलाढ्य पयाडे संघावर १५ धावांनी विजय मिळवत जेतेपदाचा चषक आणि एक लाखाचे इनाम पटकावले. पयाडे संघाला चषक आणि ५० हजार रुपयांचे इनाम देण्यात आले. दादर युनियन संघाच्या २१७ धावांच्या लक्ष्याचा पाठलाग करताना पयाडे संघाला निर्धारित २० षटकात केवळ ९ बाद २०२ धावाच करता आल्या. या लढतीत ७७ धावांची झुंजार खेळी करणाऱ्या दिव्यांश सक्सेना याची सामनावीर म्हणून निवड करण्यात आली तर स्पर्धेतील सर्वोत्तम खेळाडू म्हणून प्रबोधन संघाच्या शशांक सिंग (स्पर्धेत १८४ धावा आणि २ बळी आणि दोनवेळा सामनावीर) याची निवड करण्यात आली. भारताचे माजी कर्णधार दिलीप वेंगसरकर, उद्योग मंत्री सुभाष देसाई, यांच्या हस्ते विजेत्यांना गौरविण्यात आले.
स्कोअरबोर्ड : दादर युनियन ७ बाद २१७ (दिव्यांश सक्सेना ७७, साईराज पाटील ३६; पराग खानापूरकर २१/२, हरमीत सिंग ४१/२) वि.वि. पय्याडे सी.सी. ९ बाद २०२ (हर्ष टंक ३९, गौरव जठार ४२, खिझार दाफेदार २८/३, सिद्धार्थ राऊत ४०/२ ).
रमेश पोवार ऑस्ट्रेलियाला जाणार
मुंबई : गेल्या महिन्यात मुंबई क्रिकेट असोसिएशनचा फिरकी गोलंदाजी प्रशिक्षक म्हणून पायउतार झालेला आंतरराष्ट्रीय क्रिकेटपटू रमेश पोवार आता क्रिकेट ऑस्ट्रेलियातील तरुण फिरकी गोलंदाजांना मार्गदर्शन करणार आहे. महत्त्वाचे म्हणजे भारताचे माजी प्रशिक्षक व ऑस्ट्रेलियन क्रिकेटपटू ग्रेग चॅपेल यांनीच त्याला ही जबाबदारी सोपविली आहे. तामिळनाडूचे श्रीधरन श्रीराम यांच्यानंतर ऑस्ट्रेलियाला फिरकी गोलंदाजी मार्गदर्शक म्हणून नियुक्त केलेला रमेश हा दुसरा भारतीय खेळाडू आहे. या नियुक्तीबद्दल त्याने आनंद व्यक्त केला असून जूनमध्ये आपण या नव्या जबाबदारीसाठी ब्रिस्बेनला जाणार असल्याचे त्याने सांगितले. ही जबाबदारी सोपविल्याबद्दल रमेशने ग्रेग चॅपेल तसेच ऑस्ट्रेलियाच्या राष्ट्रीय क्रिकेटच्या योजनेचे प्रमुख ट्रॉय कूली यांचे आभार मानले आहेत.