फेडरर जिंकावा म्हणून ३६ लाखांची पैज

मटा ऑनलाइन वृत्त । लंडन

विम्बल्डनच्या पुरूष एकेरी सामन्यात ग्रासकोर्टचा बादशाह रॉजर फेडरर जिंकावा म्हणून त्याच्या एका चाहत्याने ३६ लाखाची पैज लावली आहे. फेडररचं हे आठवं विम्बल्डन असल्यानं त्याने ही पैज लावली आहे.

जॉर्ज असं फेडररच्या चाहत्याचं नाव असून तो लंडनमध्येच राहतो. एका टेक कंपनीचा तो प्रमुख आहे. त्यानं ही पैज लावताना त्याच्या प्रेयसीलाही सांगितलेलं नाही. ही पैज हरल्यावर त्याला ३६ लाखाचा फटका बसणार आहे. पण पैज जिंकल्यास त्याला १ कोटी १९ लाख ४१ हजार रूपये मिळणार आहेत. ‘माझी गर्लफ्रेण्ड फारशी टेनिस पाहत नाही. त्यामुळे तिला याची कल्पना दिलेली नाही. मी फारशा पैजा लावत नाही. पण जेव्हा बेट लावतो, तेव्हा ती जिंकेन याची खात्री असेल तरच. खरं तर आम्ही मित्र जमलो होतो. तेव्हा फेडररची खेळी पाहून माझी खात्री पटली की हा यंदाचं विम्बल्डन जेतेपद पटकावणारच.’ असं जॉर्ज म्हणाला.

फेडररने अकराव्यांदा विम्बल्डनची फायनल गाठली आहे. २०१२ मध्ये त्याने शेवटचं विम्बल्डन जेतेपद मिळवलं होतं. विम्बल्डनमध्ये पुरुष एकेरीच्या विजेतेपदासाठी रॉजर फेडरर क्रोएशियाच्या मरिन सिलिच यांच्याशी लढत देणार आहे. हे जेतेपद पटकावल्यास फेडरर विम्बल्डन स्पर्धेचा ताज सर्वाधिक वेळा पटकवणारा खेळाडू ठरणार आहे.