फ्रेंच ओपन बॅडमिंटन
वृत्तसंस्था, पॅरिस
भारताच्या सायना नेहवालने फ्रेंच ओपन बॅडमिंटन स्पर्धेतील आपले आगेकूच कायम राखले आहे. तिने डेन्मार्कच्या लिने होजमार्कवर मात करून उपांत्यपूर्व फेरीतील प्रवेश निश्चित केला.
महिला एकेरीच्या दुसऱ्या फेरीत आठव्या मानांकित सायनाने लिनेवर २१-१०, २१-११ अशी २७ मिनिटांत मात केली. सायनाने पहिल्या गेममध्ये ५-३ अशा आघाडीनंतर सलग पाच गुण घेतले. यानंतर ब्रेकला तिने ११-४ अशी आघाडी मिळवली होती. ब्रेकनंतरही फारसे वेगळे चित्र बघायला मिळाले नाही. हा गेम सायनाने सहज जिंकला. दुसऱ्या गेममध्ये सायनाने ८-६ अशा आघाडीनंतर आक्रमक खेळ केला आणि बघता बघता १८-८ अशी मोठी आघाडी मिळवली. यानंतर लिनेने तीन गुण घेतले खरे; पण त्याचा फारसा परिणाम झाला नाही. सायनाची उपांत्यपूर्व फेरीत कोरियाच्या अॅन से यंगविरुद्ध लढत होईल.