स्टार टेनिसपटू सानिया मिर्झा बनणार आई

नवी दिल्ली

भारताची स्टार टेनिसपटू सानिया मिर्झा हिच्या चाहत्यांसाठी एक सुखद धक्का देणारी बातमी आहे. ती बातमी म्हणजे सानिया आई बनणार आहे ही. येत्या ऑक्टोबर महिन्यात ती आपल्या बाळाला जन्म देणार असल्याचे स्पष्ट होत आहे. सानियाचे वडील इम्रान मिर्झा यांनीच या वृत्ताला दुजोरा दिला आहे. 'सानिया गरोदर आहे आणि ती येत्या ऑक्टोबर महिन्यात बाळंत होईल असे वाटते,' अशी माहिती इम्रान मिर्झा यांनी दिली आहे.

सानिया मिर्झा आणि शोएब मलिक यांनी आपापल्या सोशल मीडिया अकाउंटवर एक फोटो शेअर केला आहे. तो फोटो पाहिल्यानंतर सानिया गरोदर असल्याचे अंदाज बांधले जात होते.



सानिया आणि शोएबने हा फोटो #MirzaMalik हॅशटॅगने शेअर केला आहे. हजारो चाहत्यांनी हा फोटो लाइकही केला आहे. अजूनही शुभेच्छांचा वर्षाव सुरूच आहे. सानिया आणि पाकिस्तानी क्रिकेटपटू शोएब मलिक यांनी १२ एप्रिलला आपल्या लग्नाचा ८वा वाढदिवस साजरा केला होता. गुडघ्याला दुखापत झाल्यामुळे सानियाने ऑक्टोबर २०१७ पासून खेळणे थांबवले आहे.

सानियाने एप्रिल महिन्याच्या पहिल्याच आठवड्यात गोवा फेस्टीवल-२०१८ मध्ये 'लैंगिक भेदभाव' या विषयावर बोलताना आपल्या मनातील एक गोष्ट उघड केली होती. ती म्हणाली होती की, 'मी तुमच्या समोर एक गुपित उघड करणार आहे. माझे पती आणि मी यावर बोललो आहोत. आम्ही ठरवले आहे की, जेव्हा आम्हाला मूल होईल, तेव्हा आम्ही त्याचे आडनाव मिर्झा मलिक असे ठेवू'.



सानिया आणि शोएबने शेअर केलेल्या फोटोत एका बाजूला मिर्झा आणि दुसऱ्या बाजूला मलिक असे लिहिलेले आहे, तर मध्यभागी मात्र मिर्झा-मलिक असे लिहिले आहे. विशेष म्हणजे या फोटोत मुलाचे संगोपन करण्याबाबतची काही चिन्हे आहेत.