मारिया शारापोवाने घेतली पत्रकाराची फिरकी

रोम : रशियाची टेनिसपटू मारिया शारापोवाने मंगळवारी तिच्या ‘बॉयफ्रेंड’बद्दल माहिती विचारणाऱ्या पत्रकाराची फिरकी घेतली. ‘शारापोवाला बॉयफ्रेंड असता तर बरे झाले असते’, असे सूचवणाऱ्या पत्रकाराला शारापोवाने ‘तुझे लग्न झाले आहे का?’, असे विचारून गप्प केले.

उत्तेजक द्रव्य सेवनामुळे पंधरा महिन्यांची बंदीची शिक्षा पूर्ण केल्यानंतर शारापोवाने नुकतेच आंतरराष्ट्रीय टेनिसमध्ये पुनरागमन केले आहे. रोम मास्टर्स स्पर्धेच्या पार्श्वभूमीवर आयोजित केलेल्या पत्रकार परिषदेमध्ये शारापोवा बोलत होती. बंदीतून बाहेर आल्यानंतर दिनक्रम पूर्णतः बदलून गेल्याचे तिने सांगितले. नव्या वेळापत्रकाशी जुळवून घेताना दमछाक होत असली तरी मी आनंदी आहे, असे शारापोवा म्हणाली. त्यावेळी पत्रकाराने तिला ‘बॉयफ्रेंडशिवायही आनंदी आहेस का?’ असे विचारले. या प्रश्नावर शारापोवाने कोणतीही प्रतिक्रिया देणार नसल्याचे सांगितले. मात्र, त्यापुढे पत्रकाराने ‘बॉयफ्रेंड असता तर चांगले झाले असते’, अशी टिप्पणी केली. त्यावर ‘खरंच? तुझ्यासाठी चांगले झाले असते. तुझे लग्न झालेय का?’, असे प्रत्युत्तर शारापोवाने दिले.

दारियाचा मॅडीसनला धक्का

रोम मास्टर्स

वृत्तसंस्था, रोम

पात्रता फेरीतून आगेकूच केलेल्या दारिया गाव्रिलोवाने रोम मास्टर्स टेनिस स्पर्धेतील महिला एकेरीत सनसनाटी विजयाची नोंद केली. ऑस्ट्रेलियाच्या दारियाने सलामीच्या लढतीत अमेरिकेच्या मॅडीसन किजला २-६, ७-५, ७-५ असा पराभवाचा धक्का दिला.

जागतिक क्रमवारीत २३ वर्षीय दारिया ३३व्या, तर मॅडीसन १०व्या क्रमांकावर आहे. यापूर्वी गेल्या वर्षी या दोघी आमनेसामने आल्या होत्या. त्यात मॅडीसनने बाजी मारली होती. या स्पर्धेत गेल्यावर्षी उपविजेती ठरलेल्या मॅडीसनचे पारडे जड मानले जात होते. तिने पहिला सेट ६-२ ने जिंकलाही होता. मात्र, दुसरा सेटमध्ये दारियाने कडवी झुंज दिली. दहाव्या गेमअखेर ५-५ अशी बरोबरी होती. अकराव्या गेममध्ये दारियाने मॅडीसनची सर्व्हिस भेदली आणि त्यापाठोपाठ सर्व्हिस राखत सेटमध्ये बाजी मारली आणि आव्हान राखले. निर्णायक तिसऱ्या सेटमध्येही दोघींत प्रत्येक गुणासाठी चुरस पाहायला मिळाली. अकराव्या गेमअखेर दारियाकडे ६-५ अशी आघाडी होती. बाराव्या गेममध्ये बिनतोड सर्व्हिस करतच दारियाने विजयावर शिक्कामोर्तब केले. दारियाची आता फ्रान्सच्या कॅरोलिन गार्सियाशी लढत होईल. पहिल्या फेरीत रशियाच्या मारिया शारापोवाने अमेरिकेच्या क्रिस्टिना मॅकहेलला ६-४, ६-२ असे, अमेरिकेच्या व्हिनस विल्यम्सने कझाखस्तानच्या यारोस्लावा श्वेडोवावर ६-४, ७-६ (४) अशी मात केली.

महिलांच्या दुसऱ्या फेरीत ब्रिटनच्या योहाना कोंताने कझाखस्तानच्या युलिया पुतिनत्सेवावर ६-३, ६-० अशी मात केली आणि तिसरी फेरी गाठली.

बोपण्णा-पाब्लोची विजयी सलामी

रोम मास्टर्स टेनिस स्पर्धेतील पुरुषांच्या दुहेरीत रोहन बोपण्णा आणि पाब्लो क्युव्हास यांनी विजयी सलामी दिली. बोपण्णा-पाब्लो यांनी पहिल्या फेरीत सिमोन बोलेल्ली-अँड्रीय सेप्पी या इटालियन जोडीवर ६-४, ६-२ अशी सरळ सेटमध्ये मात केली. दुसऱ्या फेरीत बोपण्णा-पाब्लो यांची फेलिसियानो आणि मार्क लोपेझ या स्पॅनिश जोडीशी लढत होईल.