‘...तरीही ऑलिम्पिक होणारच’

वृत्तसंस्था, टोकियो: जगभरामध्ये पसरलेल्या करोना विषाणूच्या संसर्गामुळे या वर्षी होणाऱ्या टोकियो ऑलिम्पिकच्या वेळापत्रकामध्ये बदल करण्यासाठी दबाव येत असला, तरी हे ऑलिम्पिकचे आयोजन ठरल्याप्रमाणेच होईल, असे जपानचे पंतप्रधान शिंझो आबे यांनी शनिवारी स्पष्ट केले. या वर्षी जुलै महिन्यात जपानमध्ये टोकियो ऑलिम्पिक रंगणार आहे.

जपानमध्ये तातडीने आणीबाणी जाहीर करण्याचा कोणताही विचार नसल्याचे आबे म्हणाले. अमेरिकेचे अध्यक्ष डोनाल्ड ट्रम्प यांनी टोकियो ऑलिम्पिक पुढे ढकलण्याचा सल्ला दिल्याच्या पार्श्वभूमीवर आबे यांनी हे मत मांडले. शुक्रवारी आबे आणि ट्रम्प यांनी फोनवरून चर्चा केली होती. आम्ही ऑलिम्पिक पुढे ढकलण्याबाबत कोणतीही चर्चा केली नाही. ऑलिंपिकच्या यशस्वितेसाठी जपान आणि अमेरिका परस्परसहकार्याने काम करतील, असेही आबे यांनी नमूद केले. याविषयी आम्ही संबंधित अधिकाऱ्यांच्या आणि आंतरराष्ट्रीय ऑलिम्पिक समितीच्या (आयओसी) संपर्कात आहोत. आम्हाला नियोजनाप्रमाणेच कोणत्याही संसर्गाशिवाय ऑलिम्पिक ही स्पर्धा आयोजित करायची आहे, असे आबे यांनी सांगितले.

जपानमध्ये आतापर्यंत ७०० जण करोनाबाधित असून देशामध्ये २१ मृत्यू नोंदवण्यात आले आहेत. आयओसीचे अध्यक्ष थॉमस बॉक यांनी ऑलिम्पिकच्या आयोजनाबाबत जागतिक आरोग्य संघटनेच्या (डब्ल्यूएचओ) सूचनांचे पालन करणार असल्याचे शुक्रवारी सांगितले होते.