म. टा. प्रतिनिधी, औरंगाबाद
जर्मनीत होणाऱ्या विश्वकरंडक ज्युनिअर नेमबाजी स्पर्धेसाठी औरंगाबादची आंतरराष्ट्रीय नेमबाज हर्षदा निठवेची भारतीय संघात निवड करण्यात आली आहे.
जर्मनीतील शूल शहरात आयएसएसएफ ज्युनिअर विश्वकरंडक नेमबाजी स्पर्धा १० ते २० जुलै या कालावधीत होणार आहे. या स्पर्धेसाठी भारतीय महिला नेमबाजी संघ रवाना झाला आहे. या स्पर्धेत हर्षदा निठवे ही दहा मीटर एअर पिस्तुल व पन्नास मीटर फ्रि पिस्तुल या दोन प्रकारांत भारताचे प्रतिनिधीत्व करणार आहे. यापूर्वी हर्षदाने भारताचे प्रतिनिधीत्व करताना सात आंतरराष्ट्रीय नेमबाजी स्पर्धांमध्ये सात पदकांची कमाई केली आहे. खेलो इंडिया स्पर्धेत हर्षदाने महाराष्ट्राला सुवर्णपदक जिंकून दिले होते. मार्च महिन्यात चीन येथे झालेल्या बाराव्या आशियाई एअरगन स्पर्धेतही हर्षदाने भारतासाठी मोलाची कामगिरी बजावली होती. या स्पर्धेत तिने सांघिक रौप्यपदक पटाकावले होते. याच वर्षी महाराष्ट्र शासनाने हर्षदा निठवेला शिवछत्रपती क्रीडा पुरस्कार देऊन गौरवले आहे.
एमजीएम नेमबाजी केंद्रात हर्षदा निठवे ही नियमित सराव करते. नेमबाजी प्रशिक्षक प्रा. संग्राम देशमुख यांचे तिला मार्गदर्शन लाभले आहे. भारतीय नेमबाजी संघात निवड झाल्याबद्दल एमजीएमचे सचिव अंकुशराव कदम, डॉ. प्रवीण सूर्यवंशी, औरंगाबाद जिल्हा नेमबाजी संघटनेचे अध्यक्ष व पोलिस आयुक्त चिरंजीव प्रसाद व अन्य पदाधिकाऱ्यांनी हर्षदाचे अभिनंदन केले.