सिंगापूर ओपन: सिंधूचा पराभव; मारीन उपांत्य फेरीत

मटा ऑनलाइन वृत्त । सिंगापूर

सिंगापूर ओपन सुपर सीरिज बॅडमिंटन स्पर्धेत भारताच्या पी.व्ही. सिंधूचे आव्हान तिसऱ्याच फेरीत संपुष्टात आले. उप-उपांत्य फेरीत स्पेनच्या कॅरोलिन मरीनने सिंधूचा ११-२१, १५-२१ असा पराभव केला. नुकत्याच झालेल्या इंडिया ओपन स्पर्धेत सिंधूने स्पेनच्या कॅरोलिनला पराभूत केले होते. मारीनने या पराभवाची परत फेड केली.

सिंधू आणि कॅरोलिन यांच्यातील सामना चुरशीचा होईल असे वाटले होते. मात्र पहिल्या गेमपासूनच मारीनने सामन्यावर पडक ठेवली. पहिल्या गेमच्या सुरुवातीलाच मारीनने ७-२ अशी आघाडी घेतली होती. त्यानंतर तिने २१-११ असा पहिला गेम जिंकला. सामन्यात आव्हान राखण्यासाठी सिंधूला दुसऱ्या गेममध्ये विजय मिळवणे आवश्यक होते. मात्र दुसऱ्या गेममध्ये ही मारीनने १०-३ अशी भक्कम आघाडी घेतली. त्यानंतर तिने हा गेम २१-१५ने जिंकत उपांत्य फेरीत प्रवेश केला.

सुपर सीरिज स्पर्धांमध्ये आतापर्यंत झालेल्या सामन्यांमध्ये सिंधू आणि मारीन यांनी एकमेकांविरुद्ध प्रत्येकी ५ सामन्यात विजय मिळवला होता. आज झालेल्या सामन्यातील विजयासह मारीनने ६-५ अशी आघाडी घेतली आहे.