सिंगापूर ओपनमध्ये रंगणार 'ऑल इंडिया फायनल'

मटा ऑनलाइन वृत्त । सिंगापूर

सिंगापूर ओपन सुपर सीरिज बॅडमिंटन स्पर्धेचे विजेतेपद भारतीयालाच मिळणार हे निश्चित झाले आहे. भारताच्या किदाम्बी श्रीकांत आणि बी.साईप्रणीत यांनी उपांत्य फेरीतील सामन्यात विजय मिळवून अंतिम फेरीत प्रवेश केला आहे.

जागतिक बॅडमिंटन रँकिंगमध्ये २९व्या क्रमांकावर असलेल्या श्रीकांतने इंडोनेशियाच्या अँथनी सिनिसुका गिंटिंगचा २१-१३, २१-१४ असा पराभव करत अंतिम फेरीत प्रवेश केला. श्रीकांतच्या आधी क्रमवारीत ३०व्या स्थानावर असलेल्या भारताच्या साई प्रणीतने दक्षिण कोरियाच्या के ली डोंग क्‍यूनवर २१-६, २१-८ असा विजय मिळवत अंतिम फेरीत प्रवेश केला.

उपांत्य फेरीतील श्रीकांतच्या विजयामुळे यंदाच्या सिंगापूर ओपन स्पर्धेचे जेतेपद भारतालाच मिळणार हे निश्चित झाले आहे. श्रीकांत आणि साईप्रणीत यांच्यातील अंतिम सामना रविवारी होणार आहे.