हेडिंग्ले : अॅशेस कसोटी क्रिकेट मालिकेतील दुसऱ्या सामन्यामध्ये डोक्याला चेंडू लागल्यामुळे दुखापतग्रस्त झालेला ऑस्ट्रेलियाचा फलंदाज स्टीव्ह स्मिथ हा हेडिंग्लेमध्ये होणाऱ्या मालिकेतील तिसऱ्या कसोटीत खेळू शकणार नाही. स्मिथ या दुखापतीतून पूर्णपणे सावरला नसल्याने त्याला तिसऱ्या सामन्यात न खेळवण्याचा निर्णय घेण्यात आल्याचे क्रिकेट ऑस्ट्रेलियाने मंगळवारी जाहीर केले.
भारत अंतिम फेरीत
टोकियो : भारतीय पुरुष हॉकी संघाने ऑलिम्पिक तयारी स्पर्धेची अंतिम फेरी गाठली. मंगळवारी झालेल्या अखेरच्या साखळी लढतीत मनदीपसिंगने नोंदविलेल्या तीन गोलच्या जोरावर भारतीय संघाने यजमान जपानवर ६-३ अशी मात केली. यासह भारताचे सहा गुण झाले.
गेल्या सामन्यात भारताला न्यूझीलंडकडून पराभवाला सामोरे जावे लागले होते.
आंतरमहाविद्यालय कॅरम
मुंबई : श्रीमती पी. डी. हिंदुजा ट्रस्ट व के. पी. बी. हिंदुजा महाविद्यालयाच्या विद्यमाने
तेरावी आंतरमहाविद्यालय कॅरम स्पर्धा दिनांक २२ ते २४ ऑगस्ट २०१९ या कालावधीत के. पी. बी. हिंदुजा महाविद्यालय जिमखाना, चर्नीरोड येथे खेळविण्यात येणार आहे. या स्पर्धेत मुंबई, ठाणे, पालघरच्या महाविद्यालयातून ३५० खेळाडू सहभागी होतील.
प्रणॉयची डॅनवर मात
बेसल : भारताच्या प्रणॉय एच. एस. याने 'बीडब्ल्यूएफ' जागतिक बॅडमिंटन स्पर्धेतील पुरुष एकेरीच्या दुसऱ्या फेरीत सनसनाटी विजय नोंदविला. प्रणॉयने चीनच्या लिन डॅनला २१-११, १३-२१, २१-७ असा धक्का दिला. मे महिन्यात ऑस्ट्रेलियन ओपनमध्ये डॅनने प्रणॉयला हरविले होते, तशाच कामगिरीसाठी डॅन उत्सुक होता, तर दुसरीकडे 'त्या' पराभवाचे उट्टे फेडण्यासाठी प्रणॉय उत्सुक होता.