मुंबई : देवास, मध्य प्रदेश येथे झालेल्या राष्ट्रीय शालेय क्रीडा स्पर्धेतील सॉफ्ट टेनिस प्रकारात १४ वर्षांखालील मुलींच्या गटात महाराष्ट्राच्या संघाने सुवर्णपदक जिंकले. महाराष्ट्राने उपांत्यपूर्व फेरीत तामिळनाडूला २-१ असे नमविले तर उपांत्य फेरीत महाराष्ट्राने दिल्लीवर २-१ असाच विजय मिळविला. अंतिम फेरीत गुजरातवर २-० असे निर्भेळ यश संपादन करत विजेतेपद पटकाविले. रिया पाटील, आर्या लिंगनवड, सायली सानप, ऐशा अमरे व आयुषा इंगावले यांनी महाराष्ट्राचे प्रतिनिधित्व केले. १४ वर्षांखालील मुलांमध्ये नीलने वैयक्तिक गटात ब्राँझ तर अमरावतीच्या ओमने १७ वर्षांखालील गटात वैयक्तिक ब्राँझ जिंकले.
मुंबईला विजय मर्चंट ट्रॉफी
पंजाबवर डावाने मात
मुंबई : हिमाचल प्रदेश येथे झालेल्या विजय मर्चंट १६ वर्षांखालील मुलांच्या क्रिकेट स्पर्धेत मुंबईने पंजाबवर एक डाव आणि ५० धावांनी मात करत विजेतेपद पटकाविले. पंजाबने प्रथम फलंदाजी करताना १४२ धावा केल्या. त्यात मुशीर खानने ५ बळी घेत पंजाबला लगाम घातला. त्यानंतर स्वयम वाघ (६४), आदित्य पवार (८६), अनुराग सिंग (४६), प्रिन्स बदियानी (४९), कर्णधार आयुष जेठवा (३६) यांच्या खेळाच्या जोरावर मुंबईने ३४३ धावा करत मोठी आघाडी घेतली. दुसऱ्या डावात पुन्हा मुशीर खानने ५ बळी घेत पंजाबला १५१ धावांत गुंडाळले. त्यात आयुष जेठवाने ३ बळी घेतले.