मेसीला २१ महिन्यांचा कारावास

मटा ऑनलाइन वृत्त । माद्रीद

अर्जेंटिनाचा स्टार फुटबॉलपटू आणि बार्सिलोना संघाचा स्ट्राइकर लिओनेल मेसी आणि त्याचे वडील जॉर्ज होरेसियो मेसी यांना करचोरी प्रकरणी सुनावण्यात आलेल्या शिक्षेवर स्पेनच्या सुप्रीम कोर्टाने शिक्कामोर्तब केले आहे.

करचोरी प्रकरणी मेसी आणि जॉर्ज यांना दोषी ठरवून जुलै २०१६ मध्ये प्रत्येकी २१ महिन्यांचा कारावास आणि एकूण ३७ लाख यूरोचा दंड (सुमारे ४१ लाख डॉलर) अशी शिक्षा ठोठावण्यात आली होती. ही शिक्षा सुप्रीम कोर्टाने कायम ठेवली. दरम्यान, स्पेनमध्ये कोणत्याही प्रकारचा हिंसात्मक गुन्हा केलेला नसल्यास दोन वर्षांपेक्षा कमी कारावासाची शिक्षा माफ केली जाते. त्या न्यायानुसार मेसी आणि त्याच्या वडिलांना झालेली शिक्षा रद्द होईल, अशी शक्यताही व्यक्त केली जात आहे.

मेसी आणि जॉर्ज यांच्यावर ४१ लाख ६० हजार यूरोचा कर वाचवण्यासाठी बेलिज आणि उरुग्वेतील कंपन्यांचा वापर केल्याचा आरोप होता. हा आरोप सिद्ध होऊन या दोघांना दोषी ठरवण्यात आले आहे. मेसीने २००७ ते २००९ मध्ये आदिदास, पेप्सी-कोला, प्रॉक्टर अॅण्ड गॅम्बल, कुवेत फूड कंपनी या सारख्या कंपन्याशी केलेल्या करारामधून मिळवलेल्या उत्पन्नावरील कर बुडवला होता.

दरम्यान, मेसीला २० लाख ९० हजार यूरो, तर त्याच्या वडिलांना १६ लाख यूरो इतका दंड ठोठावण्यात आलेला आहे.