अ‍ॅपशहर

स्पोर्ट्सनशातर्फे ‘खेल दर्पण’ची मेजवानी

स्पोर्ट्सनशा आणि रोटरी क्लब ऑफ मुंबई पार्लेश्वर यांच्या संयुक्त विद्यमाने ‘खेल दर्पण’ हा कार्यक्रम विलेपार्ले (पू.) येथील प्रबोधनकार ठाकरे क्रीडा संकुलात आयोजित करण्यात आला आहे.

Maharashtra Times 21 Nov 2017, 4:00 am
मुंबई : स्पोर्ट्सनशा आणि रोटरी क्लब ऑफ मुंबई पार्लेश्वर यांच्या संयुक्त विद्यमाने ‘खेल दर्पण’ हा कार्यक्रम विलेपार्ले (पू.) येथील प्रबोधनकार ठाकरे क्रीडा संकुलात आयोजित करण्यात आला आहे. हा कार्यक्रम २५ व २६ नोव्हेंबरला सकाळी १० वाजल्यापासून रात्री ८ पर्यंत रंगणार आहे.
महाराष्ट्र टाइम्स.कॉम sportsnashas sports programme khel darpan on 25th nov
स्पोर्ट्सनशातर्फे ‘खेल दर्पण’ची मेजवानी


या कार्यक्रमास प्रवेश विनामूल्य आहे. कार्यक्रमाचे उदघाटन २५ नोव्हेंबरला रोटरी डिस्ट्रिक्ट ३१४१ चे गव्हर्नर प्रफुल्ल शर्मा यांच्या हस्ते होईल. विशेष अतिथी म्हणून ‘महाराष्ट्र टाइम्स’चे संपादक अशोक पानवलकर, निर्माता-दिग्दर्शक महेश मांजरेकर, माजी कसोटीपटू यजुर्वेंद्रसिंग उपस्थित राहणार आहेत. मुंबई शहरच्या क्रीडाअधिकारी सुवर्णा बारटक्के पालव यादेखील यावेळी उपस्थित राहतील.

या कार्यक्रमादरम्यान ५ उदयोन्मुख खेळाडूंना गौरविण्यात येणार आहे. त्यात ज्योती डाफळे (कबड्डी), मंदार हर्डीकर (टेबल टेनिस), ओम कुबल (नेमबाजी), इशिता रेवाळे (जिम्नॅस्टिक्स), ओजस जाधव (कॅरम) यांचा समावेश आहे. त्याशिवाय, खेलसेवा हे विशेष पारितोषिकही यावेळी देण्यात येईल. या पुरस्कारासाठी टेबलटेनिसपटू व प्रशिक्षक उल्हास शिर्के यांची निवड करण्यात आली आहे.

त्याव्यतिरिक्त, कार्यक्रमादरम्यान विविध तज्ज्ञांची व्याख्याने आयोजित करण्यात आली आहेत.

२५ नोव्हेंबरला दुपारी ३ वाजता महेश विचारे (क्रीडापत्रकार, महाराष्ट्र टाइम्स) क्रीडापत्रकारितेसंदर्भात मार्गदर्शन करतील तर त्याच दिवशी साडेचार वाजता सिद्धार्थ साबापथी खेळ व्यवस्थापनावर बोलतील. सायंकाळी ५.३० वाजता आहारतज्ज्ञ सरिता डावरे खेळाडूंच्या आहारासंदर्भात कानमंत्र देतील. दुसऱ्या दिवशी म्हणजे २६ नोव्हेंबरला सकाळी ११.३० वाजता मानसोपचारतज्ज्ञ डॉ. मनोज भाटवडेकर खेळाडूंच्या मानसोपचाराबद्दल मार्गदर्शन करतील. त्याच दिवशी सायंकाळी ४ वाजता सोशल मीडियाचा खेळासाठी वापर या विषयावर सौमित्र बेनगिरी बोलतील. सायंकाळी ५ वाजता डॉ. तपन आशर खेळाडूंच्या फिजिओथेरपिबद्दल सांगणार आहेत.

या व्याख्यानांशिवाय पॅरालिम्पिक्समध्ये भारताचे प्रतिनिधित्व करणारा ओम लोटलीकर, कॅरमपटू विकास धारिया व संदीप दिवे, नेमबाजीतील राष्ट्रीय खेळाडू ओम कुबल हे प्रदर्शनीय सामने खेळणार आहेत. क्रीडासाहित्याचे स्टॉल्स हे क्रीडाशौकिनांसाठी पर्वणी असेल.

संपर्क : नितीन विचारे ९८२१०९८५५७, शिरिष देशपांडे ९८६९८५२२१३.

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज