पोर्ट ऑफ स्पेन : वेस्ट इंडिजविरुद्धच्या मालिकेतील पहिला कसोटी क्रिकेट सामना जिंकण्यासाठी श्रीलंकेला अखेरच्या दिवशी २७७ धावांची गरज आहे. चौथ्या दिवसअखेर वेस्ट इंडिजने दिलेल्या ४५३ धावांच्या लक्ष्याचा पाठलाग करताना श्रीलंकेची ३ बाद १७६ अशी स्थिती झाली होती. आता अखेरचा दिवस रंगतदार ठरणार आहे. स्कोअरबोर्ड : वेस्ट इंडिज ८ बाद ४१४ आणि ७ बाद २२३ वि. श्रीलंका : १८५ आणि ५३.४ षटकांत ३ बाद १७६ (मेंडिस खेळत आहे ९४, मॅथ्यूज ३१, होल्डर १-१८, बिशू १-३२).
कॅटीचा विक्रम
सँटा क्लारा (कॅलिफोर्निया) : अमेरिकेच्या कॅटी लेडेस्कीने टीवायआर प्रो स्विम सीरिज स्पर्धेतील महिलांच्या २०० मीटर फ्रीस्टाइलमध्ये १ मिनिटे ५४.५६ सेकंद वेळ नोंदवली. या वर्षातील ही आतापर्यंतची जगातील सर्वोत्तम वेळ ठरली. कॅटीने ऑलिंपिकमध्ये पाच सुवर्णपदके मिळवली आहेत. २१ वर्षीय कॅटीने चौदा वेळा वर्ल्ड चॅम्पियनशिप स्पर्धेत सुवर्णपदके मिळवली आहेत.
'वर्चस्व राखू'
लंडन : आगामी वन-डे क्रिकेट मालिकेत आम्ही इंग्लंडवर नक्कीच वर्चस्व राखू, असे मत ऑस्ट्रेलियाचा फलंदाज ट्रॅव्हिस हेडने व्यक्त केले. शनिवारी झालेल्या सराव सामन्यात हेडने मिडलेक्स संघाविरुद्ध शानदार १०१ धावांची खेळी केली. हेडने आपल्या केन रिचर्डसन, बिली स्टँलेक, अॅण्ड्र्यू टाय या आपल्या गोलंदाजांवर विश्वास व्यक्त केला आहे. हे नव्या दमाचे गोलंदाज इंग्लंडच्या फलंदाजांवर दबाव राखतील, असेही हेडला वाटते. इंग्लंड-ऑस्ट्रेलियादरम्यानच्या मालिकेतील पहिली वन-डे लढत १३ जून रोजी खेळली जाणार आहे.