श्रीकांत, प्रणॉयचे ‘पॅकअप’

प्रणव चोप्रा-एन. सिक्की रेड्डी मिश्र दुहेरीच्या उपांत्य फेरीत दाखल

वृत्तसंस्था, टोकियो

जपान ओपन सुपर सीरिज बॅडमिंटन स्पर्धेत किदाम्बी श्रीकांत आणि एच. एस. प्रणॉय यांना एकेरीच्या उपांत्यपूर्व फेरीत पराभव पत्करावा लागला. याचबरोबर भारताचे या स्पर्धेतील एकेरीचे आव्हान संपुष्टात आले. भारताची भिस्त आता प्रणव चोप्रा-एन. सिक्की रेड्डी जोडीवर आहे. प्रणव चोप्रा-एन. सिक्की रेड्डी जोडीने मिश्र दुहेरीच्या उपांत्य फेरीत प्रवेश केला आहे.

पुरुष एकेरीच्या उपांत्यपूर्व फेरीत तिसऱ्या मानांकित व्हिक्टर अॅक्सेलसेनने आठव्या मानांकित किदाम्बी श्रीकांतवर २१-१७, २१-१७ अशी ४० मिनिटांत मात केली. जागतिक क्रमवारीत डेन्मार्कचा व्हिक्टर दुसऱ्या स्थानावर आहे, तर श्रीकांत आठव्या स्थानी आहे. यापूर्वी हे दोघे चार वेळा आमनेसामने आले होते. यात दोघांनी प्रत्येकी दोन लढती जिंकल्या होत्या. नुकत्याच झालेल्या जागतिक स्पर्धेत व्हिक्टरने सुवर्णपदक मिळवले आहे. त्यामुळे व्हिक्टर सध्या चांगल्याच फॉर्मात आहे. पहिल्या गेममध्ये व्हिक्टरने ४-१ अशी आघाडी घेत आक्रमक सुरुवात केली. यानंतर श्रीकांतने सलग चार गुण घेत आघाडी घेतली. यानंतर ५-६ अशा पिछाडीनंतर व्हिक्टरने सलग तीन गुण घेत आघाडी मिळवली. पुढे श्रीकांतने त्याला १०-१० असे बरोबरीत गाठले. ब्रेकनंतर दोघांमध्ये दीर्घ रॅलिज रंगल्या. १२-१३ असे पिछाडीवर असताना श्रीकांतने सलग चार गुण घेतले. मात्र, त्याला ही आघाडी टिकवता आली नाही. त्याच्याकडून काही टाळत्या येण्यासारख्या चुका झाल्या. जोरदार स्मॅशेसच्या जोरावर व्हिक्टरने त्याला १६-१६ असे बरोबरीत गाठले. व्हिक्टरने १६-१७ अशा पिछाडीवरून सलग पाच गुण घेत पहिली गेम जिंकली.

दुसऱ्या गेममध्ये श्रीकांतने चांगली लढत दिली. एक वेळ त्याच्याकडे ९-६ अशी आघाडी होती. उत्तरार्धात मात्र व्हिक्टरने आक्रमक खेळ केला. १२-१२ अशा बरोबरीनंतर त्याने श्रीकांतला फारशी संधी दिली नाही. एक वेळ त्याच्याकडे १८-१४ अशी आघाडी होती. श्रीकांतने आव्हान राखण्याचा आटोकाट प्रयत्न केला. पण त्यात त्याला यश आले नाही. यानंतर १९-१७ अशा आघाडीनंतर व्हिक्टरने सलग दोन गुण घेत लढत जिंकली. यानंतर चीनच्या दुसऱ्या मानांकित शि युकीने एच. एस. प्रणॉयवर २१-१५, २१-१४ असा विजय मिळवला. जागतिक क्रमवारीत प्रणॉय १९व्या, तर युकी चौथ्या स्थानी आहे. युकीचा हा प्रणॉयवरील चौथ्या लढतीतील तिसरा विजय ठरला. महिला एकेरीत स्पेनची कॅरोलिन मरीन आणि जपानच्या नोझोमी ओकुहाराने आपली आगेकूच कायम राखली. मरिनने जपानच्या अकाने यामागुचीवर २१-१८, २१-१५ अशी, तर ओकुहाराने अमेरिकेच्या बैवेन झ्हँगवर २१-१६, २३-२१ अशी मात केली. आता उपांत्य फेरीत मरिन-ओकुहारा आमनेसामने येतील.

मिश्र दुहेरीच्या उपांत्य फेरीत प्रणव जेरी चोप्रा-एन. सिक्की रेड्डीने कोरियाच्या सेयुंग जाए सेओ-किम हा ना जोडीवर २१-१८, ९-२१, २१-१९ असा संघर्षपूर्ण विजय मिळवला. पहिल्या गेममध्ये प्रणव चोप्रा-एन. सिक्की रेड्डी जोडीने १९-१६ अशी आघाडी घेतली. सेयुंग-किम जोडीने दोन गुण घेत पिछाडी भरून काढण्याचा प्रयत्न केला. पण पुढील दोन गुण घेत प्रणव-एन. सिक्की रेड्डीने पहिली गेम जिंकली. दुसऱ्या गेममध्ये सेयुंग-किम जोडीने आक्रमक खेळ केला. त्यामुळे ही गेम सहज जिंकून सेयुंग-किम जोडीने बरोबरी साधली. निर्णायक गेममध्ये सेयुंग-किम जोडीने १६-११, १९-१६ अशी आघाडी घेतली होती. प्रणव-एन. सिक्कीने सलग पाच गुण घेत गेमसह लढत जिंकली. उपांत्य फेरीत प्रणव-एन. सिक्की रेड्डी जोडीची जपानच्या ताकुरो होकी-सायाका हिरोता जोडीशी लढत होईल.