पुण्याला दुहेरी यश

मुंबईः पुण्याने ६४व्या राज्य अजिंक्यपद निवड चाचणी कबड्डी स्पर्धेत दोन्ही गटात विजेतेपद पटकावित दुहेरी यश संपादन केले. पुण्याच्या महिलांचे हे सलग दहावे अजिंक्यपद. पुरुषांना मात्र गेली दोन वर्ष उपनगर संघाकडूनच पराभवाला सामोरी जावे लागत होते. २००६मध्ये चिपळूण-रत्नागिरी येथे पार पडलेल्या स्पर्धेत त्यांनी दोन्ही गटात जेतेपद प्राप्त केले होते. त्यावेळीही दोन्ही गटात पुण्याची लढत ही मुंबई उपनगरशीच झाली होती. त्यानंतर हा योग दहा वर्षानी जुळून आला.

सांगलीवाडी- सांगली येथील मदनभाऊ पाटील बंदिस्त क्रीड़ा संकुलातील मॅटवर झालेल्या महिलांच्या अंतिम सामन्यात पुण्याने ५-५चढायांच्या जादा डावात मुंबई उपनगरला ३२-३० (८-६) असे नमवित सलग दहाव्यांदा ‘पार्वतीबाई सांडव चषकावर’ नाव कोरले; पण त्यासाठी त्यांना अखेरपर्यंत कडवी झुंज द्यावी लागली. पुण्याने सामन्याची सुरुवात झोकात करत गुण घेण्याचा सपाटा लावला. मध्यांतराला पुण्याकडे १६-११अशी आघाडी होती. शेवटची काही मिनिटे शिल्लक असताना मात्र उपनगरने २४-२० अशी आघाडी घेतली होती. त्यांना ती टिकवता आली नाही. पुण्याच्या पूजा शेलारला इतर सहाकाऱ्यांची साथ लाभल्याने पुण्याला २४-२४अशी बरोबरी साधता आली. ५-५चढायांच्या जादा डावात मात्र पुण्याने उपनगरला संधीच दिली नाही. पुण्याच्या सायली केरिपालेनी पहिल्याच चढाईत दोन गुण मिळवित पुण्याला आश्वासक सुरुवात करुन दिली. यानंतरच्या चारही खेळाडूंनी गुण घेत संघाला २ गुणांनी विजय मिळवुन दिला. पूजा शेलार, सायली केरीपाळे, दीपिका जोसेफ या पुण्याच्या विजयाच्या शिल्पकार ठरल्या. उपनगरच्या अभिलाषा म्हात्रे, कोमल देवकर यांनी कड़वी लढत दिली; पण शेवटच्या काही मिनिटांत त्यांना संयम राखता आला नाही,त्यामुळे त्यांनी ४गुणांची आघाडी गमावली. गेली तीन वर्षे उपनगरला उपविजेतेपदावर समाधान मानावे लागत आहे. यंदाचे हे उपविजेतेपदाचे त्यांचे सलग चौथे वर्ष. वडाळा-मुंबई येथे २००२मध्ये पार पडलेल्या स्पर्धेत त्यांनी महिलांच्या जेतेपदावर मोहर उमटविली होती.

पुरुषांचा अंतिम सामना मात्र एकतर्फी झाला. त्यात पुण्याने मुंबई उपनगरला ४१-२१असे सहज पराभूत करत ‘श्रीकृष्ण करंडकावर’ नाव कोरले. दहाव्या मिनिटांला लोण देत पुण्याने १०-०२ अशी आघाडी घेत दणदणीत सुरुवात केली होती. यानंतर पुण्याने मागे वळून पाहिले नाही. मध्यांतराला २१-०८अशी आघाडी घेणाऱ्या पुण्याने तोच जोश कायम ठेवत उपनगरला डोके वर काढू दिले नाही. पुण्याच्या मंगेश भगत, अक्षय जाधव, मोमिन शेख यांच्या चढाया व विकास काळे, विराज लांडगे यांचा भक्कम बचाव याला उपनगरकडे उत्तर नव्हते. उपनगरचा निनाद तावडे यांनी बऱ्यापैकी लढत दिली. त्यांच्या रिशांक देवडीगा, निलेश शिंदे यांना या सामन्यात सुरच सापडला नाही, त्यामुळे त्यांना उपविजेतेपदावर समाधान समाधान मानावे लागले.