म. टा. प्रतिनिधी, औरंगाबाद
परभणी येथे २७ ते ३१ जुलै या कालावधीत महापौर करंडक राज्य मानांकन टेबल टेनिस स्पर्धेचे आयोजन करण्यात आले आहे.
महाराष्ट्र राज्य टेबल टेनिस संघटना व परभणी जिल्हा हौशी टेबल टेनिस संघटना यांच्या संयुक्त विद्यमाने ही स्पर्धा घेण्यात येत आहे. या स्पर्धेत आंतरराष्ट्रीय खेळाडूंसह सुमारे आठशे टेबल टेनिसपटूंचा सहभाग असणार आहे, अशी माहिती परभणी जिल्हा हौशी टेबल टेनिस संघटनेचे अध्यक्ष समशेर वरपुडकर यांनी दिली.
परभणी शहरातील बहुउद्देशीय क्रीडागृह बचत भवनात ही स्पर्धा पाच दिवस रंगणार आहे. प्रकाशझोतात सामने खेळवण्यात येणार आहेत. मिडगेट, कॅडेट, सबज्युनिअर, ज्युनिअर, युथ, सिनिअर गट अशा मुला-मुलींच्या विविध गटांत ही स्पर्धा होणार आहे. या स्पर्धेतून राष्ट्रीय स्पर्धेसाठी महाराष्ट्राचा संघ निवडण्यात येणार आहे. त्यामुळे या स्पर्धेत राज्यातील मानांकित खेळाडूंसह आठशे खेळाडू खेळणार आहेत.
या स्पर्धेतील सामने दहा टेबलवर खेळवण्यात येणार आहेत. परभणी शहरात प्रथमच राज्य टेबल टेनिस स्पर्धा होत आहे. त्यामुळे स्पर्धेच्या यशस्वी आयोजनासाठी जिल्हाध्यक्ष समशेर वरपुडकर यांच्या अध्यक्षतेखाली विविध समित्यांची स्थापना करण्यात आली आहे. उपाध्यक्ष संतोष सावंत, जिल्हा कार्याध्यक्ष डॉ. माधव शेजुळ, सचिव गणेश माळवे, सहसचिव डी. पी. पंडीत, केशव शिंदे, डॉ. गुरुदास लोकरे, चेतन मुक्तावार, नागेश कान्हेकर, डॉ. विनोद गणाचार्य, डॉ. राजेंद्र तुपेकर, प्रशांत देशपांडे, धीरज देशमुख, गुणवंत कदम, नृसिंह चाटे, विक्रम हट्टेकर, कौस्तुभ कदम, गजानन समिंद्ररे, महेश कुलकर्णी, संतोष कोकीळ, चेतन सुरुसे, निखिल झुटे यांनी स्पर्धेच्या यशस्वी आयोजनासाठी पुढाकार घेतला आहे.