महाराष्ट्राच्या उत्कर्ष काळे, अविनाश साबळेचा समावेश
वृत्तसंस्था, नवी दिल्ली
ऑलिंपिक स्पर्धेत दोन पदके मिळवणारा सुशील कुमार आणि भारताला एशियाडमध्ये हेप्टॅथलॉन प्रकारात पहिले सुवर्णपदक मिळवून देणारी स्वप्ना बर्मन यांना गुरुवारी ऑलिंपिक पोडियम स्कीममधून (टॉप्स) वगळण्यात आले आहे. २०२० टोकियो ऑलिंपिक डोळ्यासमोर ठेवून 'टॉप्स' योजनेतील नवी यादी जाहीर करण्यात आली आहे.
सुशीलकुमारने २००८ आणि २०१२च्या ऑलिंपिकमध्ये अनुक्रमे ब्राँझ आणि रौप्यपदक मिळवले आहे. मात्र, या वर्षीच्या जकार्ता एशियाडमध्ये ७४ किलो गटात त्याला पात्रतेच्या पहिल्याच लढतीत पराभव पत्करावा लागला. पुढील दोन वर्षांचा विचार करता सुशीलवर खर्च करणे सरकारकडून टाळण्यात आले आहे. स्वप्नालाही या यादीतून वगळण्यात आले आहे. सरकारने २०२० आणि २०२४ ऑलिंपिक स्पर्धा डोळ्यासमोर ठेवली असून, अॅथलेटिक्स, कुस्ती आणि वेटलिफ्टिंग या तीन क्रीडा प्रकारातील 'टॉप्स'च्या योजनेतील खेळाडूंची नावे जाहीर केली. या यादीत पूर्वी अॅथलेटिक्समध्ये ३१ खेळाडूंचा समावेश होता. ती संख्या दहावर आणली आहे. यात तिहेरी उडीपटू अरपिंदरसिंग आणि स्टीपलचेसमधील अविनाश साबळे यांचा समावेश करण्यात आला आहे. त्यांना २०१९च्या वर्ल्ड चॅम्पियनशिपपर्यंत मदत केली जाणार आहे. दहा कुस्तीपटूंमध्ये महाराष्ट्राच्या उत्कर्ष काळेचा समावेश करण्यात आला आहे. पुढील काही दिवसांत इतर क्रीडा प्रकारातील खेळाडूंची यादीही जाहीर करण्यात येणार आहे.
टॉप्समधील खेळाडूंची यादी : अॅथलेटिक्स : नीरज चोप्रा, तेजिंदरतूर, सीमा पुनिया, अरपिंदरसिंग, महंमद अनास, हिमा दास, अय्यास्वामी धरुण, जिन्सन जॉन्सन, श्रीशंकर मुरली, अविनाश साबळे.
कुस्ती : संदीप तोमर, उत्कर्ष काळे, बजरंग पुनिया, दीपक पुनिया, विनेश फोगट, रितू फोगट, पूजा धांडा, साक्षी मलिक, दिव्या काकरन, साजन.
वेटलिफ्टिंग : रगला वेंकट राहुल, मीराबाई चानू.
....