म. टा. प्रतिनिधी, औरंगाबाद
भुवनेश्वर येथे झालेल्या पहिल्या खेलो इंडिया विद्यापीठ क्रीडा स्पर्धेत डॉ. बाबासाहेब आंबेडकर मराठवाडा विद्यापीठाच्या तलवारबाजी संघाने उपविजेतेपद मिळवले. हे यश विद्यापीठासाठी अभिमानास्पद आहे, असे प्रतिपादन कुलगुरू डॉ. प्रमोद येवले यांनी केले.
विद्यापीठाच्या तलवारबाजी संघाने पहिली खेलो इंडिया विद्यापीठ क्रीडा स्पर्धा उपविजेतेपद पटाकावत गाजवली. या स्पर्धेत विद्यापीठाच्या मुलांच्या संघाने दोन सुवर्णपदक व एक कांस्यपदक जिंकत उपविजेतेपद संपादन केले. यात तुषार आहेरचा मोलाचा वाटा राहिला. तुषारने वैयक्तिक फॉइल प्रकारात सुवर्ण तसेच सांघिक सुवर्णपदक व इप्पी प्रकारात वैयक्कित कांस्य अशी तीन पदके जिंकली. फॉइल प्रकारात विद्यापीठाच्या संघाने सुवर्णपदक जिंकले. या संघात तुषार आहेर, शाकेर सय्यद, दुर्गेश जहागीरदार, जगदीश औटी या खेळाडूंचा समावेश आहे. या स्पर्धेत मयुर हिरे, हेमंत शिंदे, अनिल देवकर, हर्षदा वडते यांनी लक्षवेधक कामगिरी बजावली.
याच वर्षी जम्मू येथे झालेल्या अखिल भारतीय आंतर विद्यापीठ तलवारबाजी स्पर्धेत विद्यापीठाच्या संघाने उपविजेतेपद मिळवले. या खेळाडूंना शिवछत्रपती क्रीडा पुरस्कार प्राप्त डॉ. उदय डोंगरे, डॉ. दिनेश वंजारे, डॉ. पांडुरंग रणमाळ यांचे मार्गदर्शन लाभले.
तलवारबाजीतील विद्यापीठ संघाच्या कामगिरीबद्दल कुलगुरू डॉ. प्रमोद येवले यांनी खेळाडूंची पाठ थोपटली. विद्यापीठासाठी हा क्षण अभिमानास्पद व आनंदाचा आहे असे सांगितले. या खेळाडूंना विद्यापीठ सर्वोतोपरी सहकार्य करील असे आश्वासनही दिले. प्र-कुलगुरू डॉ. प्रवीण वक्ते, कुलसचिव डॉ. साधना पांडे, क्रीडा संचालक डॉ. कल्पना झरीकर यांनीही खेळाडूंचे अभिनंदन केले.