लक्ष्य सेनला विजेतेपद
अंतिम लढतीत चीनच्या वेंग हाँग यांगवर मात
वृत्तसंस्था, नवी दिल्ली
भारताच्या लक्ष्य सेन याने सारलोरलक्स ओपन बॅडमिंटन स्पर्धेतील पुरुष एकेरीचे विजेतेपद पटकावले. अंतिम लढतीत लक्ष्यने चीनच्या वेंग हाँग यांगला १७-२१, २१-१८, २१-१६ असे पराभूत केले.
जागतिक क्रमवारीत लक्ष्य ५१व्या, तर वेंग १०२व्या क्रमांकावर आहे. यापूर्वी, हे दोघे तीन वेळा आमनेसामने आले होते. त्यात लक्ष्यने एकदा, तर वेंगने दोन वेळा बाजी मारली होती. याच वर्षी वेंगने लक्ष्यला दोनदा हरविले होते. साहजिकच या वेळीही तशाच कामगिरीची पुनरावृत्ती करण्यासाठी वेंग उत्सुक होता, तर दुसरीकडे 'त्या' पराभवांचे उट्टे काढून जेतेपदाला गवसणी घालण्यासाठी लक्ष्य उत्सुक होता. पहिल्या गेममध्ये सुरुवातीपासून दोघांत चुरस पाहायला मिळाली. ९-९ बरोबरीनंतर सलग दोन पॉइंट घेतले. अर्थात, ब्रेक झाला तेव्हा लक्ष्यकडे ११-९ अशी आघाडी होती. ब्रेकनंतर पाहता पाहता लक्ष्यने १५-११ अशी आघाडी मिळविली होती. मात्र, त्यानंतर झुंज देत वेंगने १५-१५ अशी बरोबरी साधली. लक्ष्यकडे १७-१६ अशी आघाडी असताना वेंगने सलग पाच पॉइंट घेतले आणि पहिल्या गेममध्ये बाजी मारली.
आव्हान राखण्यासाठी लक्ष्यला दुसरी गेम जिंकणे गरजेचे होते. या गेममध्ये लक्ष्यने चांगली सुरुवात केली. ब्रेक झाला तेव्हा लक्ष्यने ११-४ अशी आघाडी घेतली होती. मात्र, ब्रेकनंतर वेंगने कडवी झुंज दिली. मात्र, लक्ष्यने आघाडी कायम राखत गेम जिंकली आणि आव्हानही राखले.
निर्णायक, तिसऱ्या गेममध्ये दोघांत प्रत्येक पॉइंटसाठी 'काँटे की टक्कर' पाहायला मिळाली. १३-१३ अशी बरोबरी असताना वेंगने सलग तीन पॉइंट घेतले. अर्थात, वेंगकडे १६-१३ अशी आघाडी होती. मात्र, त्यानंतर सलग आठ पॉइंट घेत लक्ष्यने विजेतेपदावर शिक्कामोर्तब केले. ही लढत तासभर चालली. या वर्षातील लक्ष्यचे हे तिसेरे आंतरराष्ट्रीय जेतेपद ठरले. यापूर्वी, सुपर १००मधील डच ओपन स्पर्धा आणि बेल्जियन इंटरनॅशनल स्पर्धा जिंकली होती.