मुंबई : हॅरिस शिल्ड १६ वर्षांखालील मुलांच्या क्रिकेट स्पर्धेत सुपर लीगच्या दुसऱ्या फेरीत अल बरकत इंग्लिश शाळेने अँटोनिओ डा सिल्व्हा शाळेविरुद्ध २ बाद ३०२ धावा करून डाव घोषित केला. त्यात आसिफ खान ना. १२४, नूतन गोयल ना. १०० व तुषार सिंग ६४ यांचा मोलाचा वाटा होता. त्याला उत्तर देताना डासिल्व्हा हायस्कूलने २ बाद २१ धावा केल्या होत्या. पी. जे. हिंदू जिमखाना येथे हा सामना सुरू आहे.
आर्यन चौहानचे द्विशतक
१४ वर्षांखालील मुलांच्या गाईल्स शिल्ड क्रिकेट स्पर्धेच्या बाद फेरीच्या पहिल्या फेरीत अंजुमन इस्लामच्या आर्यन चौहानने ३४ चौकारांसह २०३ धावांची नाबाद खेळी केली. त्यामुळे अंजुमनने ३७१ धावा केल्या आणि एमबीएचएस शाळेला ५५ धावांत उखडले. त्यात मन भानुशालीने ६ बळी घेतले. इतर सामन्यांत विबग्योरच्या अर्चित भार्गवने ११८ धावांची खेळी केली आणि एसएम शेट्टी शाळेवर मात केली. कांदिवलीच्या विवेकानंद इंटरनॅशनल शाळेने आयईएस सेकंडरी, घाटकोपर शाळेला अवघ्या १९ धावांत गुंडाळले. अल बरकत शाळेने पार्ले टिळकला ५० धावांवर बाद करत सामना ९ विकेटसनी जिंकला. डॉन बॉस्कोने ओमकार राणेच्या ७९ धावांच्या जोरावर ३०६ धावा केल्या आणि एसआयईएस माटुंगा शाळेला ४४ धावांवर बाद केले. शर्मन देसाईने त्यात ४ बळी घेतले.