म. टा. प्रतिनिधी, औरंगाबाद
क्रीडा मंत्रालय व भारतीय तलवारबाजी महासंघ यांच्या संयुक्त विद्यमाने आयोजित पहिल्या राष्ट्रीय पातळीवरील तलवारबाजीच्या प्रशिक्षकांसाठीच्या प्रशिक्षण शिबिराचा समारोप झाला.
साई क्रीडा प्रशिक्षण केंद्रात या शिबिराचे आयोजन करण्यात आले होते. या शिबिरात देशभरातून ५५ प्रशिक्षकांनी सहभाग घेतला. समारोप प्रसंगी आशियाई तलवारबाजी पंच परिषदेचे अध्यक्ष डॉ. इयाद मेग्यारेट, शिवछत्रपती क्रीडा पुरस्कार प्राप्त शिरीष बोराळकर, क्रीडा उपसंचालक ऊर्मिला मोराळे, व्यवस्थापन परिषद सदस्य राहुल म्हस्के, जिल्हा क्रीडा अधिकारी अशोक गिरी, साई क्रीडा प्रशिक्षण केंद्राचे उपसंचालक वीरेंद्र भांडारकर, क्रीडा अधिकारी गोकुळ तांदळे, शिबिराचे समन्वयक व भारतीय तलवारबाजी महासंघाचे सहसचिव डॉ. उदय डोंगरे, डॉ. संदीप जगताप, उदय कहाळेकर, डॉ. दिनेश वंजारे, मर्कोस बिगोरा, पेटरू कुकी, गुएनाडी टायश्लर यांची प्रमुख उपस्थिती होती.
या शिबिरात जॉर्डनचे डॉ. इयाद मेग्यारेट व इजिप्तचे मेधात इल्सामन यांनी मार्गदर्शन केले. आशियाई तलवारबाजी पंच परिषदेचे अध्यक्ष डॉ. इयाद यांनी पंचांच्या प्रतिसादाबद्दल समाधान व्यक्त केले. ते म्हणाले, 'भारत देश हा खूप मोठा आहे. देशातील खेळाडूंमध्ये खूप क्षमता असून त्यांनी कठोर मेहनत घेतल्यास आंतरराष्ट्रीय स्पर्धेत यश मिळवणे अवघड नाही. या शिबिरात सहभागी झालेल्या पंचांचा दर्जा चांगला होता.' यावेळी शिरीष बोराळकर, राहुल म्हस्के यांनी मार्गदर्शन केले.
या शिबिरात सहभागी झालेल्या पंचांचा मान्यवरांच्या हस्ते गौरव करण्यात आला. उपसंचालक वीरेंद्र भांडारकर यांनी प्रास्ताविक केले. डॉ. उदय डोंगरे यांनी आभार मानले.