भारतीय बॅडमिंडनपटूंची निराशाजनक कामगिरी

जकार्ता : पात्रता फेरीत खेळणाऱ्या भारतीय बॅडमिंटनपटूंना इंडोनेशिया मास्टर्स बॅडमिंटन स्पर्धेच्या मुख्य फेरीत प्रवेश करण्यात अपयश आले. अभिषेक येलेगर, शुभंकर डे, श्रीकृष्ण प्रिया कुडरावल्ली यांना पात्रतेच्या एकेरीतील पहिल्याच फेरीत पराभव पत्करावा लागला.

पुरुष एकेरीत इंडोनेशियाच्या पणजी अहमद मौलानाने शुभंकर डेवर २१-९, २३-२१ अशी मात केली. ही लढत ३५ मिनिटे चालली. यानंतर इंडोनेशियाच्या वेगा व्हिओ निरवांडाने अभिषेक येलेगरवर २२-२०, २१-१४ असा विजय मिळवला. पुरुष दुहेरीत स्थानिक जोडी साबर कार्यमन गुतामा-फ्रँगी विजया पुत्रा जोडीने कपिल चौधरी-ब्रिजेश यादव जोडीवर २१-१२, २१-८ अशी मात केली. यानंतर महिला एकेरीत मलेशियाच्या गोह जिन वेईने श्रीकृष्ण प्रिया कुडरावल्लीला २१-७, २१-९ असा विजय मिळवला. पुरुष एकेरीच्या मुख्य फेरीतून किदाम्बी श्रीकांत आणि एच. एस. प्रणॉय यांनी स्पर्धेतून माघार घेतली आहे. पारुपल्ली कश्यपला मुख्य फेरीत खेळण्याची संधी मिळणार आहे. त्याची सलामीची लढत मलेशियाच्या वेई फेंग चाँगविरुद्ध होईल. श्रीकांतला किरकोळ दुखापत झाली असून, ३० जानेवारीपासून सुरू होणाऱ्या इंडिया ओपनमध्ये तो खेळणार आहे. ट्विटरवरून त्याने ही माहिती दिली आहे.