किशोर खोखोत उस्मानाबाद, मुलींमध्ये पुणे अजिंक्य
धुळे : खो-खोची पंढरी अशी ओळख असलेल्या धुळे येथील गरुड मैदानात झालेल्या किशोर गट राज्य अजिंक्यपद खोखो स्पर्धेत उस्मानाबादने किशोर गटात तर पुण्याने किशोरी गटात विजेतेपद पटकाविले. महाराष्ट्र खो-खो असोसिएशनच्या मान्यतेने शिवाजी विद्या प्रसारक संस्थेने राजेंद्र अंबर-मोहिते यांच्या स्मरणार्थ ही ३६ वी स्पर्धा आयोजित करण्यात आली होती. किशोरांच्या अंतिम सामन्यात उस्मानाबादने पुण्याचा १३-१२ असा तब्बल ५ मिनिटे राखून एका गुणाने विजय मिळवताना राज्य अजिंक्यपद काबिज केले. भरतसिंग वसावे, रमेश वसावे, रवी वसावे, श्रीशंभो पेठे यांनी उस्मानाबादला सलग दुसरे राज्य अजिंक्यपद मिळवून दिले. तर पुण्याच्या सागर साकर, रोशन कोळी, चेतन बिकाने विजयासाठी संघर्ष केला.
किशोरींच्या अंतिम सामन्यात पुण्याने नाशिकवर ११-१० असा पाच मिनिटे राखून एक गुणाने विजय मिळवताना राज्य अजिंक्यपदावर नाव कोरले. पुण्याच्या भाग्यश्री बडेने पुण्याच्या विजयाची पायाभरणी केली, तिला प्रांजली शेंडगे, दिक्षा चितळकर, प्रेरणा कांबळे यांनी छान साथ दिली. तर नाशिकच्या ज्योती मेढे, ललिता गोबाले व दिदी ठाकरे, सरिता दिवाने चांगली कामगिरी करूनही त्यांना पराभव सहन करावा लागला.
स्पर्धेतील सर्वोत्कृष्ट खेळाडू
सर्वोत्कृष्ट संरक्षक : भरतसिंग वसावे (उस्मानाबाद), प्रांजली शेंडगे (पुणे)
सर्वोत्कृष्ट आक्रमक : चेतन बिका (पुणे), ललिता गोबाले (नाशिक)
सर्वोत्कृष्ट अष्टपैलू : रमेश वसावे (उस्मानाबाद), भाग्यश्री बडे (पुणे)
तत्पूर्वी झालेल्या किशोरांच्या उपांत्य फेरीच्या सामन्यात पुण्याने ठाण्याचा तर उस्मानाबादने सांगलीचा पाडाव केला.
किशोरींच्या उपांत्य फेरीच्या सामन्यात नाशिकने उस्मानाबादचा आणि पुण्याने सोलापूरचा पराभव करून अंतिम फेरीत प्रवेश केला होता.