म. टा. प्रतिनिधी, औरंगाबाद
विविध खेळांना चालना देण्याकरिता महापालिकेने तब्बल ४० लाखांचे क्रीडा साहित्य खरेदीसाठी निविदा काढली. परंतु, ऑनलाइन निविदेत नेमकेकोणते साहित्य खरेदी करावयाचे याची यादीच गायब असल्याची माहिती समोर आली आहे.
महापालिकेच्या क्रीडा विभागातर्फे शहरातील विविध भागांत क्रीडा संस्कृती रूजवण्यासाठी क्रीडा साहित्य खरेदी करण्याचा निर्णय घेतला आहे. या खरेदीसाठी मनपाने ४० लाखांची निविदा काढली आहे. या बजेटमधून कोणते क्रीडा साहित्य खरेदी करायचे याविषयी चर्चा झाली. त्याची यादी टेंडरिंग विभागाला देण्यात आली असल्याची माहिती क्रीडा विभागातर्फे देण्यात आली. मात्र, ऑनलाइन निविदेत क्रीडा साहित्य खरेदीची यादीच गायब झाली आहे. त्यामुळे या रकमेचा खर्च नेमका कोणत्या साहित्य खरेदीवर करायचा हा प्रश्न निर्माण झाला आहे. ही निविदा काढण्याची महापालिकेची ही चौथी वेळ आहे हे विशेष. तीन वेळेस निविदा काढण्यात आली होती. त्यावेळी निविदा भरण्यासाठी कोणीच पुढे आले नसल्याचे समजते. कागदपत्रे व्यवस्थित नसल्यामुळे निविदा फेटाळण्यात आली असल्याचे मनपातर्फे सांगण्यात आले.
शहरात विविध ठिकाणी महापालिकेच्या क्रीडा सुविधा आहेत. त्या ठिकाणी विविध खेळांचे प्रशिक्षणही दिले जाते. महापालिकेला खरेदी करावयाचे असलेले क्रीडा साहित्य नेमके कोणाच्या वापरासाठी आहे हे अद्याप स्पष्ट झालेले नाही. अर्धवट निविदेमुळे अनेक प्रश्न अनुत्तरीत आहेत.
>> क्रीडा विभागासाठीच्या निविदेत कोणते साहित्य खरेदी करावयाचे याची यादी दिलेली आहे. चौथ्यांदा काढण्यात आलेली निविदा काही जणांनी भरली होती. परंतु, त्यांची कागदपत्रे अनियमित असल्याने ते नामंजूर करण्यात आले.
- संजीव बालय्या, क्रीडा अधिकारी, महापालिका.