म. टा. प्रतिनिधी, औरंगाबाद
रोलर रिले स्केटिंग फेडरेशन ऑफ इंडिया, रोलर रिले स्केटिंग असोसिएशन ऑफ महाराष्ट्र व साई-पूजा स्पोर्ट्स यांच्या संयुक्त विद्यमाने पावसाळी सत्रातील पहिल्या राज्यस्तरीय रोलर रिले स्केटिंग स्पर्धेचे २१ जुलै रोजी आयोजन करण्यात आले आहे.
या स्पर्धेचे आयोजन एपीआय कॉर्नर, प्रोझोन मॉल आणि आर.जे. इंटरनॅशनल स्कूल, बायपास येथे करण्यात येणार आहे. ही स्पर्धा रोलर रिले स्केटिंग असोसिएशन ऑफ औरंगाबादच्या सहकार्याने होणार आहे. या स्पर्धेत चार, सहा, आठ, दहा, बारा व चौदा वर्षांखालील आणि खुल्या गटातील खेळाडू सहभागी होऊ शकतात. खेळाडूंना इनलाइन, फॅन्सी इनलाइन, प्रोफेशनल इनलाइन, कॉड, रिले रेस आणि स्पीड रेस आदी प्रकारांत सहभाग घेता येणार आहे. रिले रेस ही स्पर्धा आठ, आठ ते बारा आणि बारा वर्षांपुढील गटात आर. जे. इंटरनॅशनल स्कूलच्या मैदानावर खेळवली जाईल. त्याचप्रमाणे स्पीड रेस ही स्पर्धा एपीआय कॉर्नर येथे घेण्यात येणार आहे. विजेत्या खेळाडूंना पारितोषिके, पदक, प्रमाणपत्र आणि स्मृतिचिन्ह देण्यात येणार आहे. आंतरराष्ट्रीय स्पर्धेसाठी निवड झालेले खेळाडू या स्पर्धेत सहभागी होणार असल्याने स्पर्धेतील चुरस वाढणार आहे. या स्पर्धेत प्रवेशासाठी १७ जुलै ही अखेरची तारीख आहे. इच्छुक खेळाडूंनी अधिक माहितीसाठी राज्य संघटनेच्या सचिव राधिका अंबे यांच्याशी संपर्क साधावा, असे आवाहन फेडरेशनचे सचिव व प्रशिक्षक भिकन अंबे यांनी केले आहे.