गेलची प्रतीक्षा लांबली
वृत्तसंस्था, प्रॉव्हिडन्स
वेस्ट इंडिजकडून वन-डे क्रिकेटमध्ये सर्वाधिक धावांचा विक्रम स्वत:च्या नावावर करण्यासाठी ख्रिस गेलला आणखी प्रतीक्षा करावी लागणार आहे. गुरुवारी वेस्ट इंडिज-भारत मालिकेतील पहिल्या वन-डे सामन्याला पावसाचा फटका बसला. शेवटचे वृत्त हाती आले तेव्हा विंडीजने १३ षटकांत १ बाद ५४ धावा केल्या होत्या. पुन्हा पाऊस आल्याने सामना थांबविण्यात आला होता.
भारताने वेस्ट इंडिजविरुद्धची टी-२० मालिका ३-० जिंकली. त्यापाठोपाठ वन-डे मालिकेतही धडाक्यात सुरुवात करण्यास भारतीय संघ उत्सुक होता. मात्र, पावसामुळे हा सामना दोन तास उशिरा सुरू झाला. सुरूवातीला हा सामना ४३ षटकांचा करण्यात आला होता. मात्र, सामन्यादरम्यान पुन्हा पाऊस आल्याने सामना प्रत्येकी ३४ षटकांचा करण्यात आला. विंडीजकडून वन-डे क्रिकेटमध्ये सर्वाधिक धावांचा ब्रायन लाराचा (१०,३४८ धावा) विक्रम मोडण्यासाठी गेलला केवळ ११ धावांची आवश्यकता होती. मात्र, अकराव्या षटकात कुलदीपने गेलला बाद केले. गेलच्या आता १०३४२ धावा झाल्या आहेत. लाराला मागे टाकण्यासाठी गेलला आणखी सात धावांची आवश्यकता आहे. दरम्यान, गेल परतल्यानंतर एव्हिन लुईस आणि शाय होप यांनी विंडीजला अर्धशतकी टप्पा पार करून दिला. मात्र, तेराव्या षटकाअखेर पावसामुळे सामना पुन्हा थांबविण्यात आला होता. त्या वेळी लुईसने २६ चेंडूंत २ चौकार आणि ३ षटकारांसह ४० धावांवर, तर शाय होप ६ धावांवर खेळ होता.