टोकियो : टोकियोत जुलै-ऑगस्टमध्ये होणाऱ्या ऑलिंपिक स्पर्धेवर करोना विषाणूचे सावट आहे. मात्र, यासाठी कुठलाही 'प्लान बी' नसल्याचे टोकियो ऑलिंपिकचे आयोजक आणि आंतरराष्ट्रीय ऑलिंपिक समितीने (आयओसी) शुक्रवारी स्पष्ट केले.
सध्या चीनमध्ये करोना विषाणूने थैमान घातले आहे. आता त्याचा शिरकाव जपानमध्येही झाला आहे. जगभरात ६४ हजार जणांना याची लागण झाली आहे. चीनमध्ये १४०० लोकांना आपला जीव गमवावा लागला आहे. जपानमध्येही एकाचा मृत्यू झाला आहे. जपानमधील ऑलिंपिक स्पर्धा अवघ्या पाच महिन्यांवर येऊन ठेपली आहे. या स्पर्धेच्या निमित्ताने हजारो लोक जपानमध्ये येतील. तेव्हा ऑलिंपिक स्पर्धेवर 'करोना'चे सावट असल्याचे बोलले जात आहे. याबाबत 'आयओसी'चे पाहणी टीमचे प्रमुख जॉन कोट्स म्हणाले, 'जागतिक आरोग्य संघटनेकडून आम्हाला सल्ला मिळाला आहे, की तूर्तास स्पर्धा रद्द करणे किंवा दुसरीकडे स्पर्धा घेण्याची गरज नाही.' शुक्रवारी झालेल्या पत्रकार परिषदेत आयोजक आणि कोट्स यांना जे अकरा प्रश्न विचारण्यात आले, ते सर्व करोना विषाणू संदर्भातच होते. स्पर्धा ठरलेल्या वेळेप्रमाणेच होईल, असे या वेळी स्पष्ट करण्यात आले. तूर्तास आयओए आणि आयोजकांकडे कुठलाही 'प्लान बी' नाहीच. ऑलिंपिकमध्ये चीनचे ६०० अॅथलिटचे पथक असण्याची शक्यता आहे. त्यांच्यावर बारकाईने लक्ष ठेवले जाईल, असे कोट्स म्हणाले.