नवी दिल्ली : युवा ऑलिम्पिकमध्ये रौप्य जिंकणारी ज्युडोपटू थांगजाम तबाबी देवीने स्पर्धेतील आपला गणवेश आंतरराष्ट्रीय ऑलिम्पिक समितीला स्वीत्झर्लंडमधील त्यांच्या संग्रहालयात ठेवण्यासाठी भेट दिला आहे. १६ वर्षीय तबाबीने ज्युडोतील ऑलिम्पिक स्तरावरील पहिलेवहिले पदक जिंकून दिले होते. नेमबाजीतील उदयोन्मुख खेळाडू सौरभ चौधरी यानेही आपली पिस्तुल या संग्रहालयासाठी भेट दिली आहे. त्याने १० मीटर एअर पिस्तुल प्रकारात सुवर्ण जिंकले होते.
बीपीसीएल, शिवशक्ती विजेते
मुंबई : शिवनेरी सेवा मंडळाने सुवर्ण महोत्सवानिमित्त आयोजित केलेल्या कबड्डी स्पर्धेत विशेष व्यवसायिक गटाच्या अंतिम फेरीच्या सामन्यात बीपीसीएल या संघाने पश्चिम रेल्वे संघाचा ३१-२५ असा पराभव करत विजेतेपद पटकाविले. महिलांच्या अंतिम सामन्यात शिवशक्तीने वीर जिजामाता संघाचा ३७-१५ असा सहज पराभव केला. बीपी.सी.एल. या संघाला ५० हजार तर उपविजेत्या संघास ३० हजारांचे इनाम देण्यात आले. विशेष व्यवसायिक गटात सर्वोत्कृष्ट खेळाडू ठरलला अजिंक्य कापरे तर महिलांमध्ये सर्वोत्कृष्ट ठरली, प्रतीक्षा तांडेल. दोघांनाही दुचाकी देऊन त्यांचा गौरव करण्यात आला.
बंगाल-यूपी लढत बरोबरीत
पुणे : विवो प्रो कबड्डी लीग स्पर्धेच्या सहाव्या हंगामातील पुण्यातील टप्प्यात रोमहर्षक अशा सामन्यात बंगाल वॉरियर्स आणि यूपी योद्धा यांच्यातील लढत ४०-४० अशी बरोबरीत सुटली. या सामन्यात बंगाल वॉरियर्सचा मणिंदरसिंग सर्वोत्तम चढाईपटू तर सुरजीत सर्वोत्तम बचावपटू ठरला. यूपी योद्धाच्या प्रशांतकुमारने चमकदार खेळाचे पारितोषिक मिळविले.