जागतिक बॉक्सिंगमध्ये सरिता, मनीषाची कसोटी

वृत्तसंस्था, नवी दिल्ली

महिलांच्या जागतिक बॉक्सिंग स्पर्धेला सुरुवात झाली असून, भारतीय बॉक्सर किती पदके मिळवतात, याबाबत उत्सुकता आहे. मात्र, भारतीय बॉक्सरसाठी पदकापर्यंतचा प्रवास सोपा नसेल. एल. सरिता देवी आणि मनीष मौन यांचीही सुरुवातीपासूनच कसोटी लागणार आहे.

३६ वर्षीय सरिता ६० किलो वजनी गटात सहभागी झाली असून, तिला सलामीच्या लढतीत पुढे चाल मिळाली आहे. दुसऱ्या फेरीत तिची लढत स्वित्झर्लंडच्या डायना सँड्रा ब्रुगेरविरुद्ध होईल. ब्रुगेरने पहिल्या लढतीत इंडोनेशियाच्या हुस्वातून हसानाहला नमविले आहे. सरिताने २००६च्या दिल्लीतील जागतिक बॉक्सिंग स्पर्धेत सुवर्णपदक मिळवले आहे. या वर्षी सरिताने इंडिया ओपन आणि पोलंडमध्ये झालेल्या सिलेसियन महिला बॉक्सिंग स्पर्धेत ब्राँझपदक मिळवले आहे. ब्रुगेरच्या खात्यात मोठी पदके जमा नसली, तरी ती २००८ पासून जागतिक स्पर्धेत सहभागी होते आहे. त्यामुळे ब्रुगेर अगदीच नवखी नाही. या लढतीबाबत सरिता म्हणाली, 'बारा वर्षानंतर मला दुसरे सुवर्णपदक मिळवण्याची संधी मिळाली आहे. या आव्हानासाठी मी सज्ज आहे. माझी स्वित्झर्लंडची प्रतिस्पर्धी लढवय्यी आहे. तिच्या मागील लढतींचे व्हिडिओ मी बघितले आहेत.' सरिताला या स्पर्धेत चौथे मानांकन आहे.

स्पर्धेतील ५४ किलो गटात २० वर्षीय मनीषाकडून पदकाची अपेक्षा बाळगली जात आहे. तिची लढत २०१६च्या जागतिक स्पर्धेतील ब्राँझपदक विजेती अमेरिकेची बॉक्सर ख्रिस्टिना क्रूझविरुद्ध होईल. क्रूझने २०१२च्या जागतिक स्पर्धेत ब्राँझपदक मिळवले आहे. मनीषा म्हणाली, 'क्रूझच्या आव्हानासाठी मी सज्ज आहे. माझी तयारी चांगली झाली आहे. पहिल्या जागतिक स्पर्धेत चमक दाखविण्यासाठी मी उत्सुक आहे.' मनीषाने वरिष्ठांच्या राष्ट्रीय स्पर्धेत रौप्यपदक मिळवले असून, इंडिया ओपनमध्ये तिने सुवर्णपदकाची कमाई केली आहे. सिलेसियन स्पर्धेत तिने रौप्यपदक मिळवले आहे. या स्पर्धेत तिने वर्ल्ड चॅम्पियन कझाकस्तानच्या डिना होलमनला पराभूत केले होते. मनीषा म्हणाली, 'प्रतिस्पर्धी कोण आहे, याचा विचार करणार नाही. खरे सांगायचे तर माझ्या गटातील काहीचींच नावे मला माहिती आहेत. पोलंडमध्ये मी जेव्हा वर्ल्ड चॅम्पियन बॉक्सर नमविले, त्या वेळी तर ती एवढी मोठी खेळाडू आहे, हे मला माहितीही नव्हते. त्यामुळे या वेळीही माझ्यावर कुठलाही दबाव नाही.'