भारताची २० वर्षांखालील वर्ल्डकपसाठी बोली

कोलकाता : 'फिफाच्या १७ वर्षांखालील वर्ल्डकपला प्रथमच एवढे घवघवीत यश मिळाले. प्रेक्षकसंख्या, भारताचे आदरातिथ्य, विक्रमांची रेलचेल झाली... खरेच भारताचे दिलखुलास कौतुक करायला हवे', फिफाचे अध्यक्ष गियानी सांगतात. शुक्रवारी कोलकात्यातील पंचतारांकित हॉटेलमध्ये पार पडलेल्या फिफा कौन्सिलच्या बैठकीनंतर त्यांनी ही प्रतिक्रिया दिली. फिफाच्या आगामी स्पर्धांबाबत अनेक निर्णय घेतले गेले; पण भारतातील मसालेदार पदार्थांचा उल्लेख करणाऱ्या फिफाच्या अध्यक्षांनी भारताला २० वर्षांखालील फुटबॉल वर्ल्डकपचे यजमानपद मिळेल की नाही, याबाबत खात्री मात्र दिली नाही. त्यासाठी नियमानुसार बोली लावावी लागणार आहे.

अखिल भारतीय फुटबॉल असोसिएशन अध्यक्ष प्रफुल पटेल यांनी आपण २० वर्षांखालील वर्ल्डकपच्या जेतेपदासाठीदेखील अधिकृत बोली लावणार असल्याचे जाहीर केले. अर्थात त्यासाठी भारताने कशी तयारी करायला हवी, किंबहुना १७ वर्षांखालील फुटबॉल स्पर्धेचे यजमानपद देताना भारताचा कोणता मुद्दा पसंत पडला होता, याबाबत सांगण्यासही फिफा अध्यक्ष गियानी यांनी स्पष्ट शब्दात नकार दिला.

फुटबॉलच क्रिकेटला मागे टाकणार!

कोलकाता : क्रिकेटवेड्या भारतीयांना आश्चर्य वाटेल; पण प्रेक्षकांच्या उपस्थितीत फुटबॉल क्रिकेटला मागे टाकणार असे दिसते आहे. २०११मध्ये पार पडलेल्या क्रिकेट वर्ल्डकपचे सामने १२,२९,८२६ प्रेक्षकांनी पाहिले होते, तर यंदा भारतात सुरू असलेल्या १७ वर्षांखालील फुटबॉल वर्ल्डकपच्या उपांत्य फेरीपर्यंतच्या सामन्यांना १२,२८,०२७ एवढे प्रेक्षक हजर होते. फायनल व ब्राँझपदकाच्या लढतीत हा आकडा वाढेल अन् १७९९चा फरकही आरामात भरून निघेल. याबाबत फिफाचे अध्यक्ष गियानी म्हणाले की, 'चीनमध्ये १९८५मध्ये पार पडलेला १७ वर्षांखालील वर्ल्डकप १२ लाख ३० हजार ९७६ प्रेक्षकांनी स्टेडियममध्ये हजेरी लावून पाहिला होता. भारत या संख्येपेक्षाही पुढे मजल मारेल. शनिवारी चीनचा विक्रमही मोडीत निघालेला असेल'.