यू मुम्बाचा स्मार्ट विजय

लखनऊ : शेवटच्या क्षणापर्यंत रंगतदार झालेल्या प्रो कबड्डी लीगमधील लढतीत यू मुम्बा संघाने यजमान युपी योद्धा संघावर ३७-३४ असा विजय नोंदविला. मोक्याच्या क्षणी मिळालेली आघाडी निसटू न देता मुम्बाने स्मार्ट बाजी मारली. पाच सामन्यांतील यू मुम्बाचा हा तिसरा विजय ठरला.

लखनौतील बाबू बनारसी दास स्टेडियममध्ये चौथ्या लेगला प्रारंभ झाला. यंदाच्या मोसमात नव्याने दाखल झालेल्या युपी योद्धाने आतापर्यंत चांगली कामगिरी केली होती, त्यांनी पाचपैकी केवळ एकच लढत गमावली होती, तर दुसरीकडे माजी विजेत्या यू मुम्बाने चारपैकी दोन लढती जिंकल्या होत्या. साहजिकच होम ग्राउंडवरील आपल्या पहिल्यावहिल्या लढतीत बाजी मारण्यास युपी योद्धा संघ उत्सुक होता. युपी योद्धाने सुरुवातही धडाक्यात केली. पहिल्या चढाईत कर्णधार नितीन तोमरने शिव ओमला बाद केले. त्यानंतर रिशांक देवाडिगाने तिघांना बाद केले. त्यामुळे पहिल्या दोन मिनिटांतच युपी योद्धा संघाने ४-० अशी आघाडी घेतली होती. दहाव्या मिनिटाला अनुप कुमारची पकड करत योद्धा संघाने यू मुम्बावर लोण चढविला आणि १२-४ अशी आघाडी मिळविली. मात्र, त्यानंतर मुम्बाने कडवी झुंज दिली. शब्बीर बापू आणि कर्णधार अनुप कुमार यांच्या चढायांच्या जोरावर मुम्बाने पिछाडी भरून काढली. मध्यंतराला युपी योद्धाकडे १५-१२ अशी आघाडी होती.

उत्तरार्धातील पहिल्याच मिनिटाला राजेश नरवालला बाहेर ढकलत यू मुम्बाने युपी योद्धावर लोण चढविला आणि १६-१६ अशी बरोबरी साधली. त्यानंतर शब्बीर बापूची पकड करण्याचा जिवा कुमार आणि नितेश कुमार यांचा प्रयत्न फसला. त्यापाठोपाठ कर्णधार नितीन तोमरचीही पकड झाली. रिशांकने यशस्वी चढाई करत युपी योद्धाला २०-१९ अशी आघाडी मिळवून दिली. मात्र, २०-२० अशी बरोबरी असताना रिशांकची पकड करण्याचा यू मुम्बाच्या खेळाडूंचा प्रयत्न फसला आणि तीन जण बाद झाले. योद्धाला २३-२० अशी आघाडी मिळाली. पाच मिनिटे बाकी असताना योद्धाच्या राजेश नरवालचीही पकड झाली आणि त्यापाठोपाठ लोण चढवत यू मुम्बाने ३५-३१ अशी आघाडी घेतली. मोक्याच्या क्षणी आघाडी टिकवून ठेवत यू मुम्बाने विजयावर शिक्कामोर्तब केले. यू मुम्बाच्या विजयात शब्बीर बापू आणि अनुप कुमार यांनी मोलाचा वाटा उचलला. त्यांना सुरिंदरने सुरेख पकडी करून चांगली साथ दिली.

योगींची उपस्थिती

उत्तर प्रदेशचे मुख्यमंत्री योगी आदित्यनाथ यांनीही युपी योद्धा आणि यू मुम्बा यांच्यातील लढतीचा आनंद लुटला. होम ग्राउंडवर लढत असल्याने युपी योद्धाच्या चाहत्यांनी बरयापैकी गर्दी केली होती. मात्र, अखेरीस योद्धाच्या चाहत्यांच्या पदरी निराशा पदरी पडली.