जलतरणपटू पोहोताना बेशुद्ध पडली अन् बुडायला लागली, प्रशिक्षकांनी जीव वाचवत अनर्थ टाळला

नवी दिल्ली : सध्या जागतिक जलतरण अजिंक्यपद स्पर्धा सुरु आहे आणि या स्पर्धेत एक धक्कादायक गोष्ट घडल्याचे पाहायला मिळाली. दोन वेळा ही स्पर्धा जिंकलेली अमेरिकेचे ऑलिम्पिकपटू अनिता अल्वारेझ ही एकेरी प्रकारात पोहत असताना अचानक बेशुद्ध पडली. अनिता बेशुद्ध पडली आणि ती तलावाच्या तळाला गेल्याचे पाहायला मिळाले.
नेमकं घडलं तरी काय, जाणून घ्या...
बुडापेस्ट येथे जागतिक जलतरण अजिंक्यपद स्पर्धा सुरु असताना अनिता ही एकेरी प्रकारात सहभागी झाली होती. या प्रकारात सहभागी होण्यासाठी ती जलतरण तलावात उतरली आणि पोहायला लागली. पण पोहचाताना अचानक ती बेशुद्ध पडल्याचे पाहायला मिळाले. बेशुद्ध पडल्यावर ती तलावाच्या तळाला जाऊ लागली, कारण तिचा स्वत:वर कोणताही ताबा नसल्याचे पाहायला मिळाले. ही गोष्ट तिथे उपस्थित असलेले प्रशिक्षक अँड्रिया फेएन्टस यांनी पाहिले आणि त्यांनी त्वरीत तलावात उडी मारली. प्रशिक्षकांनी जेव्हा तलावात उडी मारली तेव्हा नेमकं काय घडलं आहे, हे बहुतांशी जणांना समजलेच नव्हते. कारण स्पर्धा सुरु असताना प्रशिक्षकांनी तलावात का उडी मारली, अशी चर्चा त्यावेळी स्टेडियममध्ये सुरु झाली होती. पण प्रशिक्षक थोड्याच वेळात पोहत पोहत ते तलावाच्या तळाला पोहोचले आणि त्यांनी अनिताला तिथून बाहेर काढण्याचा प्रयत्न केला. या प्रयत्यांमध्ये त्यांना यश आले आणि त्यानंतर त्वरीत अनिताला उपचारासाठी नेण्यात आले. सध्याच्या घडीला अनितावर उपाचर सुरु आहेत आणि तिची प्रकृती ही आता सुधारत असल्याचे अमेरिकेच्या जलतरण संघटनेने स्पष्ट केले आहे.

याबाबत प्रशिक्षक अँड्रिया यांनी सांगितलं की, " जेव्हा ही गोष्ट घडली तेव्हा तिथे भितीचे वातावरण निर्माण झाले होते. बऱ्याच जणांना समजलं नाही की नेमकं काय घडत आहे. तेथील लिफ्टगार्ड हे तलावात उतरले नाहीत आणि त्यामुळेच मला पाण्यात उडी मारावी लागली. आता अनिताची प्रकृती सुधारत आहे. आज, गुरुवारी तिला पूर्णपणे विश्रांती घेण्याचा सल्ला देण्यात आला आहे. पण डॉक्टरांच्या सल्ल्यानंतर ती लवकरच जलतरणासाठी तलावात उतरू शकते."