म. टा. प्रतिनिधी, औरंगाबाद
भुवनेश्वर येथे सुरू असलेल्या पहिल्या खेलो इंडिया विद्यापीठ क्रीडा स्पर्धेत औरंगाबादच्या डॉ. बाबासाहेब आंबेडकर मराठवाडा विद्यापीठ संघाने तलवारबाजीत उपविजेतेपद पटाकावले.
खेलो इंडिया विद्यापीठ स्पर्धेत डॉ. बाबासाहेब आंबेडकर मराठवाडा विद्यापीठ संघाने तलवारबाजीत लक्षवेधक कामगिरी नोंदवली. साई क्रीडा प्रशिक्षण केंद्रात प्रशिक्षण घेत असलेल्या तुषार आहेरने दोन सुवर्ण व एक कांस्य अशी तीन पदके जिंकत ही स्पर्धा गाजवली. तुषार आहेरने फॉइल प्रकारात वैयक्तिक सुवर्णपदक जिंकून पदकांचे खाते उघडले. त्यानंतर इप्पी प्रकारात तुषारने वैयक्तिक कांस्यपदक संपादन केले. तुषार आहेर, दुर्गेश जहागीरदार, सय्यद शाकीर, जगदीश औटी यांच्या उत्कृष्ट कामगिरीच्या बळावर डॉ. बाबासाहेब आंबेडकर मराठवाडा विद्यापीठ संघाने फॉइल प्रकारात सांघिक सुवर्णपदक जिंकले. या कामगिरीमुळेच तलवारबाजी प्रकारात डॉ. बाबासाहेब आंबेडकर मराठवाडा विद्यापीठ संघाने उपविजेतेपद संपादन केले. यात अमृतसरच्या गुरुनानक विद्यापीठ संघाने विजेतेपद मिळवले.
या स्पर्धेत हेमंत शिंदे, अनिल देवकर, हर्षद वडते यांनीही उत्कृष्ट कामगिरी नोंदवली. या खेळाडूंना शिवछत्रपती क्रीडा पुरस्कार प्राप्त व राज्य तलवारबाजी संघटनेचे सरचिटणीस डॉ. उदय डोंगरे, स्वप्नील तांगडे, तुकाराम मेहेत्रा यांचे मार्गदर्शन लाभले आहे. या कामगिरीबद्दल कुलगुरू डॉ. प्रमोद येवले, प्र-कुलगुरू डॉ. प्रवीण वक्ते, कुलसचिव डॉ. साधना पांडे, क्रीडा संचालक डॉ. कल्पना झरीकर, साई क्रीडा प्रशिक्षण केंद्राचे उपसंचालक वीरेंद्र भांडारकर, भारतीय तलवारबाजी महासंघाचे कोषाध्यक्ष अशोक दुधारे, डॉ. पांडुरंग रणमाळ, डॉ. दिनेश वंजारे, डॉ. सुहास यादव यांनी खेळाडूंचे अभिनंदन केले.