मुंबई : विजय क्लब, गोल्फादेवी, एस एस जी; अंकुर स्पोर्ट्स, बंड्या मारुती, जय भारत, विजय बजरंग, गुड मॉर्निंग यांनी मुंबई शहर कबड्डी असो. आयोजित जिल्हा अजिंक्यपद निवड चाचणी कबड्डी स्पर्धेच्या प्रथम श्रेणी पुरुषांत उपांत्यपूर्व फेरीत धडक दिली. महिला गटात शिवशक्ती महिला संघ अ आणि ब या दोन संघा बरोबर विश्वशांती, मुंबई पोलीस महिला संघ, अमरहिंद, अंकुर, डॉ. शिरोडकर, ओम ज्ञानदीप यांनी बाद फेरीत प्रवेश केला.
शिवप्रेरणाचे कूच
मुंबई : शिवप्रेरणा मंडळ, फ्रेंड सर्कल स्पोर्ट्स, समर्थ क्रीडा मंडळ यांनी ठाणे जिल्हा कबड्डी असो. ने शारदा संकल्प प्रतिष्ठानच्या सहकार्याने आयोजित जिल्हा अजिंक्यपद निवड चाचणी कबड्डी स्पर्धेच्या स्थानिक पुरुष व्दितीय श्रेणी गटात तिसरी फेरी गाठली. दहिगावच्या शिवप्रेरणा मंडळाने जय शिव मंडळाला २५-२४असे चकवीत तिसरी फेरी गाठली.
अभिग्यान, आर्यनची द्विशतके
मुंबई : अंजुमन इस्लाम अलाना शाळेच्या अभिग्यान कुंडूच्या नाबाद २०१ धावा आणि आर्यन चौहानची २२० धावांची नाबाद खेळी तसेच या दोघांनी पहिल्या विकेटसाठी केलेली ४६८ धावांची भागीदारी या जोरावर या शाळेने १४ वर्षांखालील मुलांच्या गाइल्स शिल्ड क्रिकेट स्पर्धेचा दिवस गाजविला. अंजुमनने या धावसंख्येच्या जोरावर डॉमनिक सॅव्हिओ हायस्कूलला ४२६ धावांनी नमविले.व्हीपीएम विद्यामंदिरच्या मेघल सोळंकीने ६ बळी घेत स्वाध्याय भवनला ५६ धावांवर रोखले पण सिद्ध मोरबियाने घेतलेल्या ४ बळींमुळे व्हीपीएमला ७ बाद ५७ असा संघर्षपूर्ण विजय मिळविता आला. बालमोहनच्या सौरभ महाडिकने नाबाद १५५ धावांची खेळी करत कॅम्पियनला नमविले. डॉन बॉस्कोच्या कृष्णा अंचनने ६ बळी घेत रयान इंटरनॅशनलवरील विजयात मोलाची कामगिरी केली. डॉ. बाबासाहेब आंबेडकर विद्यालयाच्या स्वयम मोहितेची १६९ धावांची खेळी वाया गेली. सीएनएमने डी. शहाच्या १०३ धावांच्या जोरावर त्यांना ९ विकेटसनी नमविले.