सुहास जोशी यांचीही निवड
मुंबई : गेले दीड दशक क्रीडा पत्रकार म्हणून काम करणारे आणि सध्या 'महाराष्ट्र टाइम्स'मध्ये अनुभवी क्रीडापत्रकार म्हणून काम करणारे विनायक राणे यांची मुंबई मराठी पत्रकार संघाच्या आत्माराम मोरे युवा क्रीडा पुरस्कारासाठी निवड झाली आहे. तसेच गेली ३५ वर्षे क्रीडा पत्रकारितेच्या क्षेत्रात वावरणारे नवाकाळचे ज्येष्ठ क्रीडा पत्रकार सुहास जोशी यांची महेश बोभाटे क्रीडा पत्रकारिता पुरस्कारासाठी निवड झाली आहे. पत्रकार संघाचे अध्यक्ष नरेंद्र वाबळे यांनी ही घोषणा केली.
मुंबई मराठी पत्रकार संघाच्या वतीने मंगळवारी दुसऱ्या क्रीडा पत्रकारिता पुरस्कारांची घोषणा करण्यात आली. गेल्या वर्षापासून पत्रकार संघाच्या माध्यमातून हे पुरस्कार दिले जात आहेत.
दीड दशकांच्या कारकीर्दीत धडाडीची क्रीडा पत्रकारिता करणाऱ्या विनायक राणे यांनी २००३ साली युवा सकाळमधून आपली क्रीडा पत्रकारिता सुरू केली आणि ती गेल्या १२ वर्षांपासून ते 'मटा'मध्ये कार्यरत आहेत. त्यांनी प्रो कबड्डी, चेन्नई ओपन, हॉकी विश्वचषक, युवा फिफा विश्वचषकासह अनेक राष्ट्रीय-आंतरराष्ट्रीय स्पर्धांचे वार्तांकन भारताच्या अनेक शहरांमध्ये जाऊन केले आहे. सुहास जोशी यांनी १९८५ सालापासून पत्रकारिता करताना अनेक खेळाडू, संघटकांना न्याय मिळवून दिला. लेख, मुलाखतींच्या माध्यमातून त्यांनी क्रीडाक्षेत्रात आपला ठसा उमटविला.