म. टा. प्रतिनिधी, औरंगाबाद
औरंगाबादची नऊ वर्षांची उदयोन्मुख टेनिसपटू वृंदिका राजपूतने दहा वर्षांखालील राज्य टेनिस क्रमवारीत अव्वल स्थान मिळवले आहे.
महाराष्ट्र राज्य लॉन टेनिस संघटनेने दहा वर्षांखालील मुले व मुलींचे मानांकन जाहीर केले आहे. त्यात औरंगाबादची वृंदिका राजपूत १६९ गुणांसह अव्वल स्थानावर आहे. वयाच्या पाच वर्षांपासून वृंदिकाने टेनिस खेळण्यास प्रारंभ केला. विभागीय क्रीडा संकुलातील एन्ड्युरन्स टेनिस सेंटरमध्ये ती नियमित सराव करते. रुपेश रॉय यांचे तिला मार्गदर्शन लाभले आहे. दहा वर्षांखालील राज्य मानांकन टेनिस स्पर्धेत वृंदिकाने आत्तापर्यंत तीन वेळेस विजेतेपद पटाकावले आहे. अखिल भारतीय बारा वर्षांखालील टेनिस स्पर्धेतही तिने एकदा उपविजेतेपद मिळवले आहे. ज्युनिअर ग्रँड स्लॅम स्पर्धेत भारताचे प्रतिनिधीत्व करण्याचे वृंदिकाचे लक्ष्य आहे. या कामगिरीबद्दल एन्ड्युरन्स टेनिस सेंटरचे आशुतोष मिश्रा, प्रवीण गायसमुद्रे, गजेंद्र भोसले यांनी तिचे अभिनंदन केले आहे.