विम्बल्डन कोण जिंकणार? फेडरर की चिलिच?

लंडन ः ग्रास कोर्टवरील एकमेव ग्रँड स्लॅम स्पर्धा असलेल्या विम्बल्डनच्या पुरुष एकेरीचा अंतिम सामना रविवारी स्वित्झर्लंडचा रॉजर फेडरर आणि क्रोएशियाचा मरिन चिलिच यांच्यामध्ये होणार आहे. हा सामना जिंकून विक्रमी आठव्यांदा विम्बल्डनचे विजेतेपद पटकावण्याचे फेडररचे लक्ष्य असेल. अंतिम फेरीपर्यंतच्या सामन्यात एकही सेट न गमावता फेडररने आपले इरादे स्पष्ट केले आहेत. दुसरीकडे चिलिचने कारकिर्दीत खेळलेल्या अकरा विम्बल्डनमध्ये प्रथमच अंतिम फेरी गाठण्यात यश मिळवले आहे. त्यामुळे ही संधी वाया न घालवण्यासाठी चिलिच प्रयत्नांची शर्थ करेल.

उपांत्य फेरीत सॅम खूप चांगला खेळला. मात्र, मला खेळताना सकारात्मकता जाणवत होती. सामना जिंकण्यासाठी हे खूप महत्त्वाचे आहे. रॉजर (फेडरर) सध्या ग्रास कोर्टवर कारकिर्दीतील सर्वोत्तम टेनिस खेळत आहे. अंतिम सामन्यात त्याला सामोरे जाण्याची तयारी मी केली आहे.
- मरिन चिलिच,
क्रोएशियाचा टेनिसपटू

या वर्षी मी ऑस्ट्रेलियन ओपन, इंडियन वेल्स आणि मायामी स्पर्धांचे विजेतेपद मिळवू शकलो, हे माझ्यासाठीच धक्कादायक होते. या वर्षीचे पहिले तीन-चार महिने स्वप्नवत होते. विम्बल्डनसाठी मी ठरवून फिटनेसवर परिश्रम घेतले. या श्रमांचे चीज होतेय, ही चांगली गोष्ट आहे. तरीही यावर विश्वास ठेवणं थोडं कठीण आहे.
- रॉजर फेडरर,
स्वित्झर्लंडचा टेनिसपटू