विजेतेपदासाठी कार्लसन 'फेव्हरिट'
जागतिक बुद्धिबळ स्पर्धेला शुक्रवारपासून सुरुवात
वृत्तसंस्था, लंडन
नॉर्वेचा मॅग्नस कार्लसन जागतिक बुद्धिबळ स्पर्धेचे विजेतेपद राखण्यास उत्सुक आहे. कार्लसन आणि अमेरिका फॅबिआनो कॅरुआना यांच्यात शुक्रवारपासून ही स्पर्धा रंगणार आहे.
कार्लसनने मागील सलग तीन स्पर्धेत विश्वविजेतेपद मिळवले आहे. त्याने २०१३ आणि २०१४मध्ये भारताच्या विश्वनाथन आनंदला पराभूत केले होते. यानंतर २०१६मध्ये अमेरिकेत झालेल्या स्पर्धेत त्याने सर्जिय कार्जाकिनला पराभूत केले होते. आता सलग चौथे विजेतेपद मिळवण्यासाठी २७ वर्षीय कार्लसन उत्सुक आहे. वयाच्या १३व्या वर्षी कार्लसनने गॅरी कास्पारोवविरुद्धचा डाव बरोबरीत सोडविला होता. तेव्हापासून कार्लसन खरे तर चर्चेत होता. दुसरीकडे, विश्वविजेत्या बॉबी फिशरनंतर (१९७२) कॅरुआना अमेरिकेचा हा पहिला आव्हानवीर आहे. विश्वविजेतेपदाच्या लढतीचा कॅरुआनाचा हा पहिलाच अनुभव ठरणार आहे. अमेरिकेचा कॅरुआना २००५ ते २०१५ पासून इटलीकडून खेळला आहे. या वेळी तो कार्लसनला कसे आव्हान देतो, याबाबत उत्सुकता आहे.
जागतिक फिडे क्रमवारीत कार्लसन अव्वल स्थानावर असून, कॅरुआना दुसऱ्या स्थानावर आहे. कार्लसेनचे सध्याचे रेटिंग २८३५ असून, २६ वर्षीय कॅरुआनाचे रेटिंग २८३२ आहे. या दोघांमध्ये पारंपरिक पद्धतीच्या (क्लासिकल) १२ फेऱ्या होतील. दोघांना पहिल्या १०० मिनिटांत ४० चाली करायच्या. नंतरच्या ५० मिनिटांत २० चाली करायच्या आणि उर्वरित डावासाठी १५ मिनिटे असणार आहे. परंतु, पहिल्या चालीपासून ३० सेकंद वाढीव वेळ आहे. काळ्या मोहरे घेऊन खेळणाऱ्या खेळाडूची ३०व्या चालीपर्यंत बरोबरी स्वीकारता येणार नाही. परंतु, चालींच्या पुनरावृत्तीमुळे डाव बरोबरीत सुटू शकतो.
यापूर्वी कार्लसन आणि कॅरुआना हे क्लासिकलमध्ये ३३ वेळा आमनेसामने आले आहेत. यातील १० डाव कार्लसन जिंकला असून, ५ डाव कॅरुआना जिंकला आहे, तर १८ डाव बरोबरीत सुटले आहेत. ही स्पर्धा २८ नोव्हेंबरपर्यंत रंगणार आहे. बुद्धिबळ प्रेमींना दोघांमध्ये रंगतदार लढत बघायला मिळण्याची शक्यता आहे. मे महिन्यात नॉर्वे सुपर जीएम स्पर्धेत कार्लसनने ७७ चालींमध्ये कॅरुआनाला पराभूत केले आहे. त्यामुळे या वेळीही कार्लसनला जेतेपदासाठी फेव्हरिट मानले जात आहे.